Zeekr Қазақстанға екі қуатты гибрид пен электрлі универсал әкеледі

коллаж: ЖИ

Zeekr премиум автомобиль бренді 2026 жылдың соңына дейін Қазақстандағы модельдер қатарын бірден үш көлікпен толықтыруды жоспарлап отыр. Ел нарығына Zeekr 8X және 9X гибридті кроссоверлері мен 7GT электрлі универсалы шығады.
Жаңа көліктер сатылымға шыққаннан кейін Zeekr-дің Қазақстандағы модельдер қатары үштен алтыға дейін көбейеді. Қазір ресми дилерлер Zeekr 001 лифтбэгін, X шағын кроссоверін және 7X орташа өлшемді кроссоверін ұсынады.
Бренд дистрибьюторы Orbis Auto-ның мәліметінше, Zeekr 2023 жылы Қазақстан нарығына ресми шыққалы бері 1,4 мыңнан астам адам осы марканың көлігін сатып алған. Компанияның Алматы, Астана және Шымкент қалаларында төрт дилерлік орталығы бар.
Zeekr 7GT: 655 шақырымға дейін жүретін электромобиль
Қазақстанға Zeekr 7GT моделінің Еуропа нарығына арналған нұсқасы жеткізіледі. Ұзындығы шамамен 4,8 метр болатын электрлі универсал 800 вольтты платформаға негізделген.
Көліктің артқы және толық жетек нұсқалары ұсынылады. Олардың қуаты комплектациясына қарай 422-ден 646 ат күшіне дейін жетеді. Модель сыйымдылығы 75 немесе 100 кВт·сағ аккумулятормен жабдықталады.
Электромобиль бір қуаттаумен 655 шақырымға дейін жүре алады. Аккумуляторын 10%-дан 80%-ға дейін қуаттауға шамамен 15 минут қажет. Толық жетекті ең қуатты нұсқа сағатына 100 шақырым жылдамдыққа 3,3 секундта жетеді.
Еуропада модельдің бағасы шамамен 48 мың еуродан басталады. Қазақстандағы құны әзірге жарияланған жоқ.
Zeekr 8X: қуаты 1401 ат күшіне дейін жетеді
Zeekr 8X — ұзындығы 5,1 метр болатын ірі плагин-гибридті кроссовер. Оның бес және алты орындық нұсқалары бар.
Стандартты модельдің күштік қондырғысы екі литрлік бензин қозғалтқышы мен екі электр моторынан тұрады. Олардың жалпы қуаты 898 ат күшіне жетеді. Кроссовер сағатына 100 шақырым жылдамдыққа 3,9 секундта үдейді.
Үш электр моторы бар спорттық нұсқа 1401 ат күшіне дейін қуат өндіреді және 100 шақырым жылдамдықты үш секундқа жетпей бағындырады. Автомобильге сыйымдылығы 55,1 немесе 70 кВт·сағ аккумулятор орнатылады.
Zeekr 9X модельдер қатарының флагманы болады
Қазақстанға жеткізілетін ең ірі модель — Zeekr 9X. Флагман гибридті кроссовердің ұзындығы 5,24 метр, ал дөңгелек базасы шамамен 3,17 метрді құрайды. Салоны бес немесе алты адамға арналған.
Модельдің стандартты күштік қондырғысы 898 ат күшін өндіреді. Ал үш электр моторымен жабдықталған Zeekr 9X Hyper нұсқасының жалпы қуаты 1401 ат күшіне дейін жетеді. Мұндай кроссовер сағатына 100 шақырым жылдамдықты шамамен 3,1 секундта алады.
Үш модельдің де Қазақстандағы сатылымының нақты басталу мерзімі, комплектациялары мен бағалары кейінірек жарияланады.