Зейнетақы жинағын мерзімінен бұрын алу талаптары өзгерді

Қазақстанда зейнетақы жинақтарының ең төменгі жеткіліктілік шегін есептеудің жаңа әдістемесі күшіне енді.
Енді азаматтардың зейнетақы шотында қалуға тиіс ең төменгі сома жаңа формула бойынша анықталады.

Жаңа әдістемеге сәйкес, есептеу кезінде азаматтың жасы, болжамды өмір сүру ұзақтығы, ең төменгі зейнетақы мөлшері, болашақ зейнетақы жарналары, инвестициялық кірістілік және басқа да көрсеткіштер ескеріледі. Осылайша мемлекет азаматтың болашақ зейнетақы төлемдерін қамтамасыз ету үшін шотта қандай көлемде қаражат қалуы керектігін алдын ала есептейді.

Өзгерістер нәтижесінде зейнетақы шотында сақталуға тиіс ең төменгі сома ұлғаяды. Соған байланысты тұрғын үй сатып алу немесе емделу мақсатында мерзімінен бұрын пайдалануға болатын жинақ көлемі азаюы мүмкін.

Сонымен бірге зейнетақы жинағын баспана жағдайын жақсартуға және медициналық қызметтерге пайдалану тетігі бұрынғысынша сақталады.

Жаңа қаулыға сәйкес, Бірыңғай жинақтаушы зейнетақы қоры үш жұмыс күні ішінде 2026 жылға арналған жаңартылған жеткіліктілік шектерін жариялауы тиіс.

Айта кетейік, 2026 жылғы 4 маусымға дейін берілген өтінімдер бұрынғы талаптар бойынша қаралады. Ал 5 маусымнан бастап тапсырылған өтінімдер жаңа әдістеме негізінде есептеледі.

Бұған дейін Асқарбек Ертаев азаматтардың зейнетақы жинақтарын тұрғын үй жағдайын жақсартуға немесе емделуге пайдалану мүмкіндігі сақталатынын мәлімдеген болатын.