Зейнетақы жинақтарын толығымен аударуға болады Тимур Сүлейменов тәуекелдер туралы айтты

Бұған дейін қазақстандықтарға Бірыңғай жинақтаушы зейнетақы қорындағы жинақтарының 100 пайызына дейін жеке басқарушы компанияларға аударуға рұқсат берілетіні хабарланған болатын. Ұлттық банк төрағасы Тимур Сүлейменов осы шешімге қатысты пікір білдірді, деп хабарлайды Tengrinews.kz тілшісі.

Ұлттық банкте өткен брифинг барысында Сүлейменовтен қыркүйектен бастап күшіне енетін жаңа ережелерді бағалауды, сондай-ақ салымшылар үшін ықтимал тәуекелдер туралы айтып беруді сұрады.

Ұлттық банк төрағасының айтуынша, реформаның басты артықшылығы – азаматтардың таңдау құқығының пайда болуында.

"Біз бұл шешімді құптаймыз, өйткені азаматтарда таңдау болуы керек. Бұл адам барлық қаражатын БЖЗҚ-дан алып, жеке компанияға беруге міндетті дегенді білдірмейді. Шешімді салымшының өзі қабылдайды", - деді Сүлейменов.

Ол консервативті стратегияны ұстанатын салымшылар өз жинақтарын БЖЗҚ-да қалдыра алатынын атап өтті. Сонымен қатар зейнетке шығуына әлі көп уақыт бар жас қазақстандықтар анағұрлым белсенді инвестициялық стратегиясы бар басқарушы компанияны таңдай алады.

Тимур Сүлейменовтің айтуынша, қазір нарықта БЖЗҚ-дан бөлек кәсіби жеке басқарушы компаниялар жұмыс істейді, оларда жалпы зейнетақы портфелінің шамамен 0,5 пайызы шоғырланған. Ұлттық банк басшысы мұндай компаниялар жоғары кірістілік, сенімділік пен тұрақты нәтижелер көрсете бастаған сайын, қазақстандықтар оларға өз зейнетақы жинақтарын нық сеніммен тапсыра бастайды деген пікір білдірді.

"Көптеген триллиондық портфельді басқару объективті түрде оңай емес. Бұл өте ірі және икемділігі төмен активтер көлемі. Шағын басқарушы компаниялар мобильді әрі бейімделгіш бола алады: инвестициялық мүмкіндіктерді тезірек тауып, оларға қаржы салып, кіріс алуға және нәтижені бекітуге қабілетті", - деді ол.

Ықтимал тәуекелдер туралы айта келе, Сүлейменов оларды кез келген инвестицияға тән стандартты жағдайлар деп атады:

ҚАЗІР ТАЛҚЫЛАНЫП ЖАТЫР

ІІМ егде жастағы жүргізушілер үшін маңызды мәлімдеме жасады

Бүгін 09:22 1

Жарты ғасырдан кейін миллиондаған тыңдалым: танымал “Ақ сәулем“ әнінің авторы қазір қалай өмір сүріп жатыр?

Бүгін 10:06 1

"Негізгі тәуекел - жоғары кірістілікті көздеген инвестор күткен нәтижеге қол жеткізе алмауы мүмкін. Жалпы алғанда, сөз нарықта үш жылдан астам уақыт жұмыс істеп келе жатқан сенімді компаниялар туралы болып отыр. Сондықтан олардың нәтижелерін, стратегиялары мен уәделерін мұқият зерделеп, содан кейін ғана дербес шешім қабылдау маңызды".

2026 жылдың қыркүйегінен бастап Қазақстанда зейнетақы жинақтарын басқарудың жаңа ережелері күшіне енеді. Қабылданған заңға сәйкес, салымшылар жеке инвестициялық портфельді басқарушылардың сенімгерлік басқаруына өз зейнетақы жинақтарының 100 пайызына дейін аудара алады. Бұған дейін 50 пайыздық шектеу қолданылып келген.

Еңбек министрлігі жеке басқарушыларға өту ерікті түрде қалатынын, ал мемлекет міндетті зейнетақы жарналарының сақталуына енгізілген сомалар көлемінде кепілдік беруді жалғастыратынын атап өтті.

Бұл ретте жеке басқарушы компаниялар ықтимал теріс кірістілікті меншікті капиталы есебінен жабуға және капитал мен лицензиялау бойынша қатаң талаптарға сай болуға міндетті.

Google News арқылы жаңалықтарымызды қадағалаңыз