Зеленский Трампқа Қадыровты ұрлап әкетуді ұсынды

АҚШ-тың Ресейді бейбітшілікке мәжбүрлейтін құралдары бар. Мысалы, олар Шешенстан басшысы Рамзан Қадыровты ұстау операциясын жүргізе алады, сонда Путин мұны көріп, өз болашағы туралы ойланатын болады.

Бұл туралы Украина президенті Владимир Зеленский онлайн-брифинг кезінде журналистерге мәлімдеді, деп хабарлады УНИАН.

Одан «егер жақын арада бейбіт келісімге қол жеткізу мүмкін болмаса, Украинаның батыстық серіктестері қалай әрекет етуі керек?» деп түсініктеме беруді сұраған. «Мен бейбіт келісім болғанын, дипломатияның нәтиже бергенін өте қатты қаладым. Біз бұл үшін қолдан келгеннің бәрін жасап жатырмыз», - деп жауап берді Зеленский.

Сонымен қатар, ол бейбіт келісім болмаған жағдайда, серіктестері жылдамырақ әрекет ету керектігін білетінін атап өтті.

«Соғыс бізде емес, оларда болып жатқандай сезінуі керек. Олар мұны сезінуі тиіс. Олар бәрін біледі — Әуе шабуылына қарсы қорғаныс (ӘШҚ), біздің мықты армиямыз, дрондар өндірісіне арналған ақша, аспанды қорғау. Мұны бәрі жақсы түсінеді», - деп атап өтті Зеленский.

Оның айтуынша, дипломатиялық бағытта, атап айтқанда, америкалықтар қазір өнімді жұмыс істеп жатыр.

«Бізде жақсы нәтижелер бар. Бірақ мұның бәрі әлі соңына дейін жеткізілген жоқ. Олар Ресейге қысым көрсетуі керек. Оларда құралдар бар, олардың қолынан келеді. Олар қатты қалаған кезде Ресейге қысым жасау құралдарын таба алады. Бастысы — Украина олар үшін басымдық (приоритет) болуы керек», - деп қадап айтты Зеленский.

Осы тұрғыда ол АҚШ-тың Венесуэладағы әскери операциясын еске салды, оның барысында Николас Мадуро әйелімен бірге қолға түскен болатын.

«Операция жүргізді ме? Жүргізді. Нәтижесін бүкіл әлем көріп отыр. Мұны тез жасады. Олар осындай бір операцияны Қадыровқа қатысты жасасын. Сол қанішерге қатысты. Бәлкім, сонда Путин мұны көріп, ойланар», - деп түйіндеді Украина президенті.