Жамбыл диқандары 66 500 га жерге су үнемдеу технологиясын енгізді

Жамбыл облысында су үнемдеу технологиясын пайдаланатын шаруалар көбейді, деп хабарлайды 24KZ. Мысалы, биыл диқандар 66 500 гектарға тамшылатып және жаңбырлату технологиясын пайдаланды. Келер жылы бұл алқаптар аумағы тағы 10 мың гектарға артады. Жаңа технологияның пайдасы қандай?

77 жастағы Алтынбек Керімқұлов ғұмырының 60 жылын ауыл шаруашылығына арнаған. Шаруа қожалығында 700 гектар жер бар. Пияз, бидай, арпа және мақсары егеді. Екі жыл бұрын алты ұңғыма қаздырған. Соның есебінен 300 гектар жерге тамшылатып және жаңбырлатып суару жүйесін енгізді. Автоматты жүйенің арқасында қожалықтың алатын өнімі көбейген.

Алтынбек Керімқұлов, шаруа қожалығының басшысы:

- Тамшылатып жіберген су нық түбіне барып тамып тұрады, дәрі де тамағы сонымен барып тұрады. Соның себебінен өнімді. Су жетпейтін жерлерден мол өнім алады. Мынау мақсары дейді. Таудың бөктеріндегі су бармайтын жерлерге соны егіп, содан жақсы өнім алып отырмыз. Тамшылату технологиясын 200 гектарға, қылша пиязға пайдаланып отырмыз. Өйткені ол жаққа ештеңе егілмейтін еді. Соны пайдаланып, екі жыл, үшінші жыл өте жақсы болып тұр. Өнім бар.

Шаруашылық әр маусым сайын 70 адамды жұмыспен қамтиды. Келер жылы тағы 2 ұңғыма қазып, су үнемдеу алаңдарын арттырмақ. Жалпы Жамбыл облысында 300 шаруашылық суарудың заманауи технологиясын қолданады. Ауыл шаруашылығы басқармасындағылар бұл егістіктердің көлемін 76 мың гектардан асырмақ. Ол үшін шаруаларға мемлекеттен қаржы қарастырылады.

Нұрғиса Қанқожаев, Ауыл шаруашылығы басқармасының бас маманы:

- Су жүйесін жүргізу, инфрақұрылым жүргізуге 50%, сонымен қатар аталған жүйені енгізе отырып, жаңбырлатып суару немесе тамшылатып суару жүйесін енгізгенге қосымша 50% мемлекет тарапынан субсидия алуға болады. Яғни инфрақұрлым жүйесіне не кіреді? Сол аталған жүйеде шаруаларға қажетті ұңғыма жүйесі, қажеттілік жағдайына қарай бассейн, сонымен қатар электр ток жүйесі қарастырылған.

Өңірде 2026 жылы тағы 10 мың гектарға заманауи суару жүйесін енгізілмек. Ал диқандар оған қажетті құрылғыны облыстың өзінен арзанға алу мүмкіндігіне ие. Себебі аймақта биыл тамшылатып суару жүйелерін шығаратын өндіріс іске қосылды. Сонымен қоса келер жылы құны 10 млрд теңге болатын суару жабдықтарын шығаратын тағы бір зауыт ашылмақ.

Авторлары: Мерей Бает, Тимур Сейілхан, Елдар Байділді