Жамбыл спортының жұлдызы биік

Тәуелсіздік жылдары Тараз спортшылары 8 олимпиадаға қатысып, 11 жүлдені қоржынға салды.

Таланттар мекенінде ұрпақ сабақтастығы жалғасып жатыр. Спортта жарқ еткен жас саңлақтар өсіп келеді. Мәселен, биыл жергілікті атлеттер республикалық және халықаралық жарыстарда 1 397 медаль ұтып алды.

Жамбыл спорты десе, бірден Жақсылық Үшкемпіров, Серік Қонақбаев, Болат Жұмаділов  пен  Ермахан Ибрайымов еске түседі. Алты алаштың абыройын әлемде асқақтатқан Бақтияр Артаев, Ақжүрек Таңатаров пен Елдос Сметов та солардың қатарында. Мықтыларды тізе беруге болады. Спорттың дамуына үлес қосып жүрген мыңдаған жампоз бар. Солардың бірі – Бақтияр Тілегенов. Даңқты боксшы 18 жасында Қазақстан чемпионы атанып, 19 жасында Азияны бағындырды. Сөйтіп 1996 жылы Егеменді Қазақстаның алғашқы құрамында болып, Атланта олимпиадасына қатысты. Атақты Мейвейзермен жұдырықтасқан да осы Жамбылдың баласы. 2011 жылы өңірде Кәсіпқой бокс клубының құрылуына атсалысып, бүгінде 192 былғары қолғап шеберін баптап жүр.

Бақтияр Тілегенов, «Жамбыл» кәсіпқой бокс клубының басшысы:

-Біздің жасөспірімдер 18 ден ары қарай қиындау болып жатты ғой. Жарысқа шығуы, бұл жерде клубтың тиімділігі ұтып келсе, жақсы результатына сәйкес айлыққа қояды. Содан кейін 10 жастан 40 жасқа дейін бокста жарыстарға шыға алады.

Тәуелсіздік алғалы  жамбылдық спортшылар барлық жазғы Олимпиада ойындарына қатысып, жалпы саны 29 лицензия иеленді. Нәтижесінде өңір спортшылары 3 алтын, 4 күміс және 4 қола медальға қол жеткізді. Бүгінде чемпиондардың жолын жалғаған жас спортшылар өсіп келеді. Олар жыл басынан бері түрлі республикалық және халықаралық ресми жарыстарда 1 397 медаль жеңіп алды. Ал ұлттық құрама сапында өңірдің 826 өрені ел намысын қорғап жүр. Солардың арасында Нұрданат Айтанов бар. 10 жылын спортқа арнаған жас палуан – 2 дүркін Азия чемпионы, Әлем чемпионатының қола жүлдегері атанып үлегерген.

Нұрданат Айтанов, спортшы:

-Мақсатым – қазақта қазір олимпиада чемпионы жоқ, сол олимпиада чемпионы болу. Еркін күрестен олимпиада чемпионы жоқ. Тек қана еңбек етіп, өзіміздің жаттықтырушыларымызды тыңдап, дұрыс жүріп, еңбек етсең, нәтижесін аласың.

Аймақтағы 2 353 спорт нысанында, спорттың 85 түрі қамтылған. Бүгінде 29 мыңнан аса адам кәсіби түрде спортпен шұғылданады. Жауаптылар бұқаралық спортқа аса мән беріп, жас таланттарды ауылдардан іздеп жүр.  Ол үшін шалғай елдімекендерге спорт кешендерін салып жатыр.

Ақниет Жеңісбай, облыстық дене шынықтыру және спорт басқармасының бөлім басшысы:

-Өңірде 21 спорт нысанының құрылыс жұмыстары жүргізілуде. Бүгінде 2 спорт нысаны қолданысқа берілді. Жыл соңына дейін қосымша 8 спорт нысаны қолданысқа беру жоспарланып отыр. Қалған спорт нысандарының құрылыс жұмыстары 2026 жылға өтпеді. Жалпы облыс бойынша спорттық инфрақұрылыммен қамтамасыз ету деңгейі 68,4 пайызды қамтып отыр. Бұл көрсеткіш республика өңірлерінің ішінде Жамбыл облысы алқашқы қатарда болып саналады.

Жамбыл спортының іргесі бұрыннан мықты. «Соңғы жылдары жасалған қолайлы жағдай мен қолдаудың арқасында жаңа буын споршылар да  абыройлы жолды жалғастыратынана сенімдіміз», - дейді сала мамандары.

Мерей Бает, Бақытжан Бапаев, Елдар Байділдә