Жамбылдық креаторлар бір күнде 8,6 миллион теңгенің өнімін өткізді

Астанадағы Qazaq Creative Hub алаңында Жамбыл облысының «Асқақ рухты Әулиеата» креативті жәрмеңкесі ашылды, – деп хабарлайды Aikyn.kz
Жәрмеңкеде дәстүрлі қолөнер бұйымдары, өңірдің авторлық брендтері, заманауи технологиялар және креативті индустрия саласындағы жобалар таныстырылды.

Жергілікті қолөнершілердің туындылары да көпшілікке ұсынылды. Қолөнер залында киізден, ағаш пен былғарыдан жасалған бұйымдар, ұлттық нақыштағы зергерлік әшекейлер және кәдесыйлар қойылған. Сондай-ақ көпшілік ұлттық киімдерді сатып ала алады.
Жәрмеңкеде өңірдің әдеби мұрасы, бейнелеу және фотоөнері таныстырылды. Жамбыл облыстық көзі көрмейтін және әлсіз көретін азаматтар кітапханасы «Алтын қор» цифрлық кітабын, төрт форматта әзірленген инклюзивті ертегі кітаптарын және 3D технологиялар негізінде жасалған тактильді макеттерді жәрмеңкеге қойды. Бұдан бөлек, жергілікті баспалардың кітаптары, суретшілердің картиналары, мүсіндер мен фототуындылар болды.

Ұлттық мәдениет пен білімді заманауи цифрлық технологиялармен сабақтастырған IT-жобалар да айрықша орын алды. Олардың қатарында жасанды интеллект қолданылатын зияткерлік және әлеуметтік кеңістіктер, жастарға мамандық таңдауға көмектесетін цифрлық жүйелер, сондай-ақ тарихи-мәдени мұраны интерактивті цифрлық форматта танытатын жобалар бар.
Сонымен қатар елорда тұрғындары мен қонақтары жасанды интеллект көмегімен әзірленген қазақ ертегілері мен анимациялық фильмдерді тамашалай алады.

Жәрмеңкенің алғашқы күніне 3500 адам келіп, креаторлар 8,6 миллион теңгенің өнімін сатты.