Жаңа адамдар қозғалысы үндеу жариялады

«Жаңа адамдар» жастар қозғалысының қатысушылары жаһан жұртына үндеу жариялады.

Олар Каспий теңізінің тартылып, тұнығы лайланғанына қапалы. Экобелсенділер теңіз жағасына жиналып, дауылпаз соқты. 

Жыл сайын 100 млн текше метр кәріз суы Каспий теңізіне төгіледі. Сол секілді 200 мың тоннадан астам мұнай қалдықтары да қоршаған ортаға жайылып, суды ластайды. Салдарынан жылына мыңдаған балық қырылып, бір ғасырдың бедерінде итбалықтың 90 пайызы жойылған. «Жаңа адамдар» қозғалысының қатысушылары осылай дейді. Олар жаһан жұртын қарт теңізді құтқаруға шақырды.

Әлем Әліпбаев, «Жаңа адамдар» Жастар қозғалысының мүшесі:

- Су айдыны жылдан жылға қарқынды түрде азайып бара жатыр.  Еліміздің президенті Қасым-Жомарт Тоқаев айтып өткендей бұл тек ғана өңірлік мәселе емес, бұл бүкіл халықаралық қауымдастық үшін дабыл қағатын жағдай. Бұл мәселені шешу үшін барлық салада кірісуіміз қажет. Яғни үкімет басшылығы, салалы бөлімдер. Осының барлығымен қатар біз азаматтық қоғам ретінде атсалысуымыз қажет. Біз сыртта тұруымызға болмайды.

Қоршаған ортаны қорғауға бейілді 300 белсенді Каспий жағасына жиналып, дауылпаз соқты. Сондай-ақ алып батпырауықты ұшырып, әлем елдерінің назарын аударуға тырысты.

Алпамыс Әбілов, «Жаңа адамдар» Жастар қозғалысының баспасөз хатшысы:

- Каспийдің тағдыры бәрімізге қатысты болып тұр. Себебі ол тек ғана судың мәселесі емес, ол бүкіл біздің өмір салтымызға әсер ететін құбылыс. Мәселен, қазіргі таңда Каспий жылына бірнеше миллиметрге азайып тұрса, бірнеше жылдан кейін ол бүкіл елдердің өмір салты өзгеріп, басқаша болайын деп тұр.

«Жаңа адамдар» жастар қозғалысының қатарында 15 мыңға жуық жас бар. Олар бес жылдан бері түрлі тақырыпта пікір білдіріп, белсенділік танытып жүр. 

Шернияз Жалғасбекұлы, Досбол Байділдин