Жаңа Ата заң Әділетті Қазақстан мен Заң мен тәртіп қағидатына кепілдік береді ТүркПА

— ҚР Сыртқы істер министрлігінің шақыруымен ТүркПА миссиясы 15 наурызда референдум барысына байқау жүргізді. Миссия құрамында Әзербайжан, Қырғызстан, Түркия парламенттерінің өкілдері мен сайлау комиссияларының мүшелері кірді. Осы орайда Астана, Алматы, Түркістан қалаларында болып, референдум барысындағы ұйымдастыру іс-шараларына, үгіт-насихат талаптарына, құқықтық жағына ерекше назар аудардық, — деді Түркия Ұлы ұлттық жиналысының мүшесі Осман Местен тілшілер сұрағына жауап бере отырып.

Оның сөзіне қарағанда, ТүркПА өкілдері өңірлердегі мемлекеттік органдарда, референдум комиссияларында кездесу өткізді.

— Қазақстанның жаңа Конституциясында жаңарған баптарды толық қарап шықтық. Құжатта елеулі өзгерістер қамтылған. Бұл ретте жаңа Ата заңда адам құқығын қорғауға, сондай-ақ «Әділетті Қазақстан» мен «Заң мен тәртіп» қағидатына кепілдік береді, — деді Түркия Ұлы Ұлттық Жиналысының мүшесі.

Осман Местеннің айтуынша, миссия өкілдері 115 референдум учаскеде болған. Дауыс беру заңнама талаптарына сәйкес өтті.

— Байқаушылар референдум жақсы деңгейде ұйымдастырылғанын, барлық рәсім ашық болғанын атап өтті. Біздің тарапымыздан ешқандай заң бұзу дерегі анықталмады. Сондықтан референдумның сәтті өтуіне орай Қазақстан Республикасына құтты болсын айтқым келеді. Елдеріңіз гүлденіп, әл-ауқаты арта берсін, — деді ол.

Айта кетейік, 15 наурызда Қазақстанда жаңа Ата Заңның жобасы бойынша жалпыұлттық референдум өтті. 

Биыл 12 ақпанда Қазақстан Республикасының жаңа Ата Заңының қорытынды жобасы жарияланды. 

Мемлекет басшысы 2026 жылғы 15 наурызда республикалық референдум өткiзу туралы Жарлыққа қол қойды. 

Республикалық референдумда берілген бюллетеньде «Жобасы бұқаралық ақпарат құралдарында 2026 жылғы 12 ақпанда жарияланған Қазақстан Республикасының жаңа Конституциясын қабылдайсыз ба?» деген сауал қойылды.

Орталық референдум комиссиясының мәліметіне қарағанда, Қазақстанда дауыс беру құқығы бар азаматтардың 73 пайыздан астамы өз таңдауын жасады. 

Бірінші exit poll нәтижесіне қарағанда, референдумда халықтың 86,7%-ы жаңа Конституцияны қолдады.