Жаңа заң банк жүйесін нығайтуға бағытталған Берік Бейсенғалиев

Мәжіліс депутаты Берік Бейсенғалиев банк заңнамасындағы жаңа реформалар қаржы нарығын ашық әрі бәсекеге қабілетті етуге бағытталғанын жеткізді. Депутаттың айтуынша, базалық лицензияны енгізу арқылы банк секторына жаңа ойыншылардың келуі жеңілдейді, ал мінез-құлықтық қадағалау азаматтардың қаржылық құқықтарын қорғауға мүмкіндік береді, – деп хабарлайды Aikyn.kz.

Депутат бүгінгі банк заңнамасының реформалары соңғы жылдары қабылданған қаржы секторын дамыту бойынша кешенді шаралардың жалғасы екенін атап өтті.

- Қарастырылып отырған жаңа заңда бірнеше негізгі міндеттер шешіледі.

Бұл - нарыққа жаңа қатысушылардың келуі үшін жағдай жасау, бәсекелестікті арттыру, цифрлық қаржылық технологияларды дамыту және банктердің экономиканы қаржыландыруға қатысуы.

Базалық лицензияны енгізу арқылы банк нарығына қол жеткізуді оңайлату көзделеді. Менің ойымша, бұл прогрессивті қадам. Елдегі көптеген ірі микроқаржы ұйымдары қазірдің өзінде жеткілікті капиталды жинады және аймақтық банкке айналып, шағын және орта бизнеске несие бере алады.

Бізде «қаржылық ойыншылар» неғұрлым көп болса, бәсекелестік соғұрлым жоғары болады, ал бұл экономиканы несиелендіруге оң әсер етеді. Реттеуші тарапынан банктер мен микроқаржы ұйымдары біздің азаматтарға ұсынатын қаржылық қызметтердің сапасына толық бақылау енгізіледі.

Бүгінгі таңда халықтың қаржылық сауаттылық деңгейі өте төмен. Қарыз алушының қаржылық мінез-құлқына тәрбиесі, білімі, материалдық жағдайының деңгейі, ақшалай жинақтардың болуы әсер етеді.

Жаңа нормалар бойынша қаржы ұйымдары несие бермес бұрын кімге несие беретінін тексеріп, барлық тәуекелдерді бірден анықтауға міндетті болады.

Жарнама немесе жосықсыз тәжірибелер арқылы қосымша қаржы өнімдерін шектен тыс ұсынуға жол берілмейді. 

Сонымен қатар, банктер комиссия мен төлемдерді қоса алғанда, қаржылық өнімдер туралы толық ақпаратты ашып көрсетуі керек.

Сондықтан мінез-құлықты қадағалауды енгізу – бұл банктерді бағалауда, сондай-ақ пайда көру пен тұрақтылық тұрғысынан ғана емес, сонымен қатар азаматтардың құқықтарын қорғау тұрғысынан да үлкен қадам.

Жаңа заң банк жүйесін нығайтуға және бәсекеге қабілетті болуына, тұтынушылардың құқықтарын қорғауға және ұлттық цифрлық инфрақұрылымды дамытуға бағытталған, - деді депутат.