Жаңбыр жауып, үсік жүреді: бірнеше өңірде дабылды ескерту жарияланды

Синоптиктер 31 қазанда елімізде тұман түсіп, найзағай ойнайды, жел күшейіп, үсік жүреді деп болжап отыр, соған байланысты дабылды ескерту жарияланды, деп хабарлайды Egemen.kz «Қазгидрометке» сілтеме жасап.

Ақмола облысында түнде облыстың батысында, солтүстігінде және оңтүстігінде оңтүстік және оңтүстік-батыстан жел соғып, екпіні 15–20 м/с, күндіз сол аумақтарда 23–28 м/с дейін жетеді. Облыстың оңтүстік-батысында өрт қаупі жоғары болады.

Солтүстік Қазақстан облысында түнде және таңертең батыста тұман түседі. Күндіз оңтүстік-батыстан және батыстан жел соғып, екпіні кей жерлерде 15–20 м/с жетеді.

Қостанай облысының батысында және солтүстігінде қатты жаңбыр жауады. Түнде және таңертең солтүстігінде мен шығысында тұман түседі. Жел оңтүстік-батыстан солтүстік-батысқа ауысып, екпіні кей жерлерде 15–20 м/с жетеді. Облыстың оңтүстігінде өрт қаупі өте жоғары, ал оңтүстік-батысында жоғары деңгейде сақталады.

Қарағанды облысында оңтүстік-шығыстан және оңтүстіктен жел соғып, күндіз батысында, солтүстігінде және шығысында екпіні 15–20 м/с дейін күшейеді. Облыстың батысында өрт қаупі жоғары болады.

Ұлытау облысында оңтүстік-шығыстан және оңтүстіктен жел соғып, кей жерлерде солтүстігінде, шығысында және оңтүстігінде екпіні 15–20 м/с жетеді. Облыс бойынша өрт қаупі жоғары, ал оңтүстігінде өте жоғары деңгейде сақталады.

Шығыс Қазақстан облысының солтүстігінде, шығысында және оңтүстігінде тұман түседі. Күндіз оңтүстік-шығысында желдің екпіні 15–20 м/с дейін күшейеді.

Абай облысының солтүстігінде және шығысында тұман түседі. Таңертең және күндіз оңтүстігінде және орталығында желдің екпіні 15–20 м/с жетеді. Облыстың оңтүстігінде өрт қаупі жоғары болады.

Алматы облысында түнде және таңертең оңтүстігінде тұман түседі.

Жетісу облысында түнде және таңертең солтүстігінде, орталығында және таулы аймақтарда тұман түседі. Алакөл көлдері маңында желдің екпіні 15–20 м/с, кей жерлерде 23–28 м/с дейін күшейеді. Түнде орталығында 2 градусқа дейін үсік жүреді.

Жамбыл облысында түнде және таңертең оңтүстігінде және таулы аймақтарда тұман түседі. Жел солтүстік-шығыстан оңтүстік-батысқа ауысып, кей жерлерде (оңтүстік-батыста, солтүстік-шығыста және таулы өңірлерде) екпіні 15–20 м/с, күндіз 25 м/с дейін жетеді. Облыстың батысы мен солтүстігінде өрт қаупі өте жоғары, ал орталығында, оңтүстігінде және шығысында жоғары деңгейде сақталады.

Түркістан облысында күннің соңында таулы аймақтарда қатты жаңбыр жауады. Күндіз батыстан және оңтүстік-батыстан жел соғып, екпіні 15–20 м/с, кей жерлерде 23–28 м/с дейін жетеді. Облыстың оңтүстігінде және шөлді аймақтарда өрт қаупі өте жоғары болады.

Шымкент пен Түркістан қалаларында күндіз желдің екпіні 15–20 м/с жетеді.

Қызылорда облысында түнде және таңертең солтүстігінде және шығысында тұман түседі, күндіз орталығында және солтүстігінде шаңды дауыл соғады. Жел оңтүстіктен батысқа ауысып, күндіз орталығында және солтүстігінде екпіні 15–20 м/с жетеді. Өрт қаупі өте жоғары, ал орталығында және солтүстігінде жоғары деңгейде сақталады.

Ақтөбе облысында батыстан және солтүстік-батыстан жел соғып, күндіз солтүстігінде, оңтүстігінде және шығысында екпіні 15–20 м/с дейін жетеді. Оңтүстігі мен шығысында өрт қаупі жоғары, ал батысында, солтүстік-шығысында және орталығында өте жоғары деңгейде болады.

Батыс Қазақстан облысында түнде және таңертең батысында және солтүстігінде тұман түседі.

Атырау облысында түнде және таңертең батысында және оңтүстігінде тұман түседі. Облыстың шығысында өрт қаупі өте жоғары, солтүстік-шығысы мен оңтүстік-шығысында жоғары деңгейде сақталады.

Маңғыстау облысында батысы мен оңтүстігінде өрт қаупі жоғары деңгейде сақталады.