Жансая Әбдімәлік Үндістандағы турнирден не себепті кеткенін түсіндірді

Белгілі қазақстандық шахматшы Жансая Әбдімәлік арада біраз уақыт өткен соң ұлттық құрамадағы әріптесі Бибісара Асаубаевамен болған келеңіздікке қатысты пікір білдірді. Спортшы өзіне тағылған айыптарды неліктен негізсіз деп санайтынын түсіндірді, деп хабарлайды newtimes.kz.

Кана Бейсекеевтің YouTube-арнасына берген сұхбатында Жансая Әбдімәлік алғаш рет 2023 жылы Нью-Делидегі Гран-при кезеңіне қатысудан бас тартқаннан кейін айтылған «спортқа жат мінез-құлық» туралы айыптарға егжей-тегжейлі жауап берді. Шахматшы аталған турнирдің жекелей сында өткенін, демек, оның шешімі басқа ойыншылардың нәтижесіне әсер етпегенін атап өтті.

«Маған Бибісараның наразылығы түсініксіз. Біріншіден, бұл — жекелей турнир, мен ешкімді ұятқа қалдырып отырған жоқпын. Негізінде, бұл оған мүлдем қатысты емес. «Ойнағың келсе — ойна». Егер бұл командалық чемпионат болса, мен ел алдындағы жауапкершілік үшін отырып ойнар едім. Бірақ мен жалғыз болғанда — бұл тек менің шешімім», — деді Жансая.

Сондай-ақ, спортшы қарсыласының әлеуметтік желідегі бұрынғы жазбаларына қатысты мысқылмен: «Этот вброс с борщами — просто смешно», — деп пікір білдірді.

Еске сала кетейік, дау 2023 жылдың наурызында басталды. Сол кезде Жансая Әбдімәлік ұйымдастыру жұмыстарының нашарлығынан (шахматшыларды әуежайдан ешкім күтіп алмаған және тұратын жердің жағдайы қанағаттанарлықсыз болған) Үндістандағы турнирден кетіп қалған еді. Бибісара Асаубаева бұған жауап ретінде отандасын көпшілік алдында сынап, оның бұл әрекетін «эгоистік» деп атады.

Кейінірек ФИДЕ президенті Аркадий Дворкович ұйымдастырушылардың қателігін мойындап, кешірім сұрады, алайда қазақ шахматының қос көшбасшысы арасындағы қарым-қатынас сол күйі суық болып қалды.

Жеке келіспеушіліктерге қарамастан, қос бойжеткен де елдің «алтын қоры» болып қала береді:

Жансая Әбдімәлік — Орталық Азия тарихында ерлер арасындағы гроссмейстер атағын алған алғашқы әйел.

Бибісара Асаубаева — тарихта блицтен әйелдер арасында екі дүркін әлем чемпионы атанған алғашқы шахматшы.

Қазіргі уақытта екі спортшы да жеке араздық пен құраманың кәсіби мүддесін бөлек ұстануға тырысып, Қазақстан туы астында өнер көрсетуін жалғастырып келеді. 

Бүгін, 10:48