Жапонияда күшті жер сілкінісінен кейін цунами туралы ескерту жарияланды

Жер сілкінісінің магнитудасы бастапқыда 7,4 деп бағаланған, бірақ кейінірек жоғары қарай қайта қаралды. 

Құрбан болғандар мен жарақат алғандар туралы ақпарат түскен жоқ.

Жапонияның метеорологиялық агенттігінің мәліметінше, жер сілкінісінің ошағы 10 шақырым тереңдікте орналасқан.

Агенттік Хоккайдо, Аомори және Иватэ префектураларының Тынық мұхиты жағалаулары үшін цунами туралы ескерту жариялап, жақын арада биіктігі 3 метрге жететін цунами болады деп болжады. 

Иватэ префектурасындағы Кудзи портында биіктігі 80 сантиметр цунами тіркелді.

Аомори мен Мияги префектураларындағы Хигасидори және Онагава атом электр станцияларының, сондай-ақ Фукусима префектурасындағы Фукусима-Дайичи және Дайни АЭС операторларының мәліметінше, ешқандай ауытқулар тіркелген жоқ.

Токио мен Син-Аомори станциялары арасындағы Tohoku Shinkansen жүрдек пойызының қатынасы тоқтатылды. 

Премьер-министр Санаэ Такайти цунами туралы ескертулер мен кеңестер берілген аймақтардың тұрғындарын қауіпсіз жерге көшуге шақырды.

Еске салсақ, өткен аптада Каспий теңізінде магнитудасы 4,6 балдық жер сілкінісі болды.