Филиппинде күшті жер сілкінісінен кейін цунами қаупі туралы ескерту жарияланды

Зардап шеккендер мен қираулар туралы ақпарат түскен жоқ.

Филиппиннің вулканология және сейсмология институты магнитудасы 2,6-дан 4,9-ға дейінгі дүмпулерді тіркеуді жалғастырып жатыр. 

Ведомство сонымен қатар Шығыс Давао, Шығыс Самар, Оңтүстік Лейте және Солтүстік Суригао провинцияларына цунами қаупі туралы ескерту жасап, жағалаудағы аудандардың тұрғындарды тез арада биік жерлерге эвакуациялануды ұсынды. 

GMA News телеарнасының хабарлауынша, Давао аймағындағы билік мектептер мен мемлекеттік мекемелер жұмысын дереу тоқтатуға бұйрық берді. 

Ел президенті кіші Фердинанд Маркос оңтүстіктегі тұрғындарды эвакуациялауға бұйрық бергені мәлім болды.

— Қазіргі кезде біз жағдайды бағалап, барлығының қауіпсіздігін қамтамасыз етіп жатырмыз. Мен Төтенше жағдайлар қаупін азайту және басқару жөніндегі ұлттық кеңеске, Азаматтық қорғаныс басқармасына, Қарулы күштерге, Филиппин жағалау күзетіне және барлық тиісті мекемелерге жағалаудағы аудандарды дереу эвакуациялауды, апаттық байланыс желілерін іске қосуды және әрекеттерін жергілікті билік органдарымен тығыз үйлестіруді тапсырдым, — деді ол.

«Тынық мұхиттық өрт сақинасы» деп аталатын аймақта орналасқан Филиппин жер сілкінісі мен жанартау атқылауы жиі болатын әлемдегі ең сейсмикалық белсенді елдердің бірі саналады. 

Бұған дейін Филиппинде бір апта ішінде 8 мыңнан астам жер сілкінісі тіркелгенін жазған едік. 

Филиппин орталығындағы Себу провинциясында болған күшті жер сілкінісі салдарынан кем дегенде 69 адам қаза тапты. 

Kazinform үшін ТАСС серіктес агенттігі ұсынған.