Жапониядағы жер сілкінісі салдарынан 13 адам қаза тапты. Өңірде жаңа дүмпулер күтілуде

Жапонияның оңтүстік-батысындағы Кюсю аймағында болған магнитудасы 7,1 балдық жер сілкінісі салдарынан 13 адам қаза тапты. Зардап шеккен аудандарда ғимараттар мен көпірлер қираған, деп хабарлайды Tengrinews.kz NHK басылымына сілтеме жасап.

Басылымның мәліметінше, Кумамото префектурасындағы жерасты дүмпулері жапондық сейсмикалық қарқындылық шкаласы бойынша ең жоғарғы 7 балға жеткен. Жапонияда мұндай қуатты жер сілкінісі соңғы рет 2024 жылдың басында, Жаңа жыл күні Ното түбегінде тіркелген болатын.

Жапония премьер-министрі Такаичи Санаэ Кумамотодағы бірнеше жерасты дүмпуінен 13 адамның қаза тапқанын, тағы 31 адамның жарақат алғанын мәлімдеді.

Жапонияның метеорологиялық агенттігі тұрғындарды жаңа күшті жерасты дүмпулеріне дайын болуға шақырады.

"Алдағы апта бойы, әсіресе жақын арадағы екі-үш күнде сейсмикалық қарқындылығы 7 балға жететін ықтимал жер сілкіністеріне дайын болға шақырамыз", - делінген ведомство хабарламасында.

Кумамото қаласына іргелес орналасқан Касима қаласындағы сауда орталығында жер сілкінісінен кейін жарылыс болды. Онда екі адам мерт болды.

Жергілікті полицияның мәліметінше, жарылысқа дейін сауда кешенінен 200-ге жуық сатып алушы, қызметкерлер мен өзге де адамдар эвакуацияланған.

Жер сілкінісі салдарынан Яцусиро қаласындағы Nippon Paper Industries кәсіпорнында түтін мұржасы құлап, өзге де нысандар зақымдалды. Онда екі адам қаза тауып, тағы тоғыз адам хабар-ошарсыз кеткендер тізімінде.

Қаладағы көпірлердің бірінде жол төсемі опырылып, соның салдарынан көлік қозғалысы тоқтады.
Аймақтағы ауруханаларға түрлі жарақатпен 130-дан астам адам жеткізілді.

Kyushu Electric Power Company компаниясы өз сайтында жергілікті уақыт бойынша сәрсенбі күнгі таңғы 7:30-дағы жағдай бойынша Кумамото префектурасында 37 000-ға жуық үй жарықсыз қалғанын хабарлады.

Google News арқылы жаңалықтарымызды қадағалаңыз