Жаркент қаласының оқушылары қайырымдылық жәрмеңкесін өткізді

Жетісу облысы Жаркент қаласының оқушылары қайырымдылық жәрмеңкесін өткізді.

«Күзгі асар» деп аталатын шарада балалар өз аулаларындағы жемістер мен өздері пісіріп әкелген тағамдарды саудалап, түскен қаражатты мұқтаж жандардың игілігіне жұмсады. «Келешек мектептері» ұлттық жобасымен салынған мекемеде жасөспірімдерді ізгілікке баулитын, қарым-қабілетін ашатын 20-дан аса бастама қолға алынып, түрлі үйірме жұмыс істейді.

Сөреде самсап тұрған тағамдардың бәрі қаршадай балалардың қолғабыс етуімен жасалған. Еңбегімен өзгеге көмек беруге ниеттенген оқушылардың бірі Жәния Нұрланқызы. Ол сыныптастарымен тәтті тоқаштың бірнеше түрін пісіріп әкелді.

Жәния Нұрланқызы, оқушы:

- Еттен жасалған тәтті бәліштерді пісіріп алып келдім. Бұл бәліштің бір кусогі 250 теңге тұрады. Анам екеуіміз сыртын жасап, 3А деп безендердік. Жүрекке ұқсас тортты алмадан жасадық. Біз осыларды сатып қайырымдылық қорына апарып қайырымдылық жасаймыз. 

Игілікті істен жоғары сынып оқушылары да қалыс қалмады. Олар кептірілген жалбыз, итмұрын, түймедақ сынды шөптерден шай жасап, әртүрлі тосап әзірледі.

Әлия Ерасылова, Жаркент қаласындағы орта мектеп мұғалімі:

- Бұл жерде балалар шөптердің пайдасын жеміс жидектердің пайдасын түсінеді. Осы жоба арқылы биология пәніне қызығушылығы артып, өсімдіктерді терең зерттеп, әрбір сабақ сайын әрбір өсімдіктің қандай пайдасы бар екенін олардың бойында қандай витаминдері бар екенін айтып түсініп жатыр. 

«Келешек мектебінде» білім берумен қатар ұлттық ойындарды үйретуге басымдық берілген. Балалардың ептілігін дамытатын бестас, асық ату және тоғызқұмалақтан жарыстар өтіп тұрады. Сабақтан тыс уақытта әдеби кітаптар оқытылып, соның негізінде шағын қойылымдар сахналанады.

Бәтима Тұрсынқызы, Жаркент қаласының тұрғыны:

- Бұл мектепте менің алғашқы немерем 3ші А сыныбында оқиды. Бұл мектептегі мұғалімдердің білім сапасына және ұстаздардың біліктілігіне әрбір оқушының жүрегіне жол тауып жатқандарына ризамын. Осы мектепте оқып жатқанына қуаныштымын.

Айдана Нұрғазықызы, Жаркент қаласындағы орта мектеп директорының орынбасары:

- Қазір бізде 20-дан аса жоба жүзеге асып жатыр. Яғни тәрбие-оқу процесін алған кезде оқушылар өздерінің шығармашылық қабілеттерін дамытады. Және де ерте жастан кәсіптік бағдар бойынша өз жұмыстарын скл ашуға бейімделіп шығады. 

Былтыр ашылған білім ордасында мыңнан аса бала оқиды. «Адал азамат» біртұтас тәрбие бағдарламасын негізге алған ұстаздар оқушылардың бойына ұлттық құндылықтарды сіңіріп, еңбекқор әрі саналы ұрпақ тәрбиелеуді мақсат етіп отыр.

Шыңғыс Қалиден, Жеңіс Әбдірешов