Жарықсыз және қоршаусыз: жүргізушілер Алматы облысындағы тасжолға шағымданды

Алматы облысының жүргізушілері ұзындығы 124 шақырым болатын Қонаев – Бақанас тасжолын күрделі жөндеуден өткізуді сұрап отыр. Олар кеңес дәуірінде салынған жолдың әбден тозығы жеткенін айтады, деп хабарлайды Tengri Auto "Жетінші арнаға" сілтеме жасап.

Тасжол небәрі екі жолақтан тұрады және мұнда жарықтандыру жоқ. Алда келе жатқан көлікті басып озу үшін жүргізушілерге қарсы бағытқа шығуға тура келеді. Бұған қоса, жолдың екі жағында қоршаулар жоқ, сондықтан күн батқан соң жолға үй малы мен жабайы аңдар шығып кетеді. Түнде жүргізушілер тек көлік шамдары мен ай сәулесіне ғана сенуге мәжбүр, сондықтан бұл уақытта мұнда жүруден қорқады.

"Түнде бұл жолмен жүру қиын. Жарық жоқ. Екі жағында мал көп. Әрине, ақырын айдаймыз, бірақ жол жиегінде мал шынымен де көп. Егер мұнда жарық орнатылса немесе ең болмағанда екі жағынан қоршау қойылса, жақсы болар еді", – дейді жүргізушілердің бірі.

Бұл ретте тасжолдың жүктемесі де жоғары, мұнда күн сайын мыңға жуық автокөлік өтеді.

Ал жолды күтіп ұстауға жауапты мамандар оның жағдайы қанағаттанарлық екенін және жақын арада күрделі жөндеу жоспарланбағанын мәлімдеді.

"Мұның бәрі қозғалыс қарқындылығына байланысты. Бақанас бағытындағы жолды төрт жолаққа дейін кеңейту өте көп қаражатты талап етеді. Сонымен қатар бұл жолдың жөндеуаралық мерзімі әлі өткен жоқ. Бұған дейін мұнда жөндеу жүргізілген, бекітілген жөндеуаралық кезеңге сәйкес, келесі жөндеудің уақыты әлі келген жоқ", – деп түсіндірді облыстық жолаушылар көлігі және автомобиль жолдары басқармасының бас маманы Нұрдәулет Асқаров.

Бізді Google-дың негізгі дереккөздер тізіміне қосыңыз