Жазасын өтеушілер жұмыспен қамтылды

Қарағанды мен Ұлытау облысындағы түзеу мекемелерінде екі мыңға жуық  жазасын өтеуші еңбек етіп, табыс тауып жүр. Бүгінде колония аумағында кәсіпкерлермен арадағы келісім-шарт негізінде 59 кәсіпорын іске қосылған. 

Оларға жазасын өтеушілер ерікті түрде  жұмысқа орналасады. Бүгінде олар өндірістік цехтарда киім тігіп, металл бұйымдарын жасап, жарықдиодты шамдар құрастырады, тіпті саңырауқұлақ өсірумен де айналысады.

Долинка кентіндегі №30 түзеу мекемесіндегі мына саңырауқұлақ цехы бірнеше жылдан бері  табысты жұмыс істеп келеді. Өнім өңірдегі дүкендер мен базарларға тұрақты түрде жеткізіледі. Цехта алты адам еңбек етеді. Олар саңырауқұлақты тамшылата суару әдісімен өсіріп, шыққан өнімін жинап, кептіреді.  Жазасын өтеуші Руслан Ким бұл жұмыстың қыр-сырын меңгерген. Тапқан табысының бір бөлігімен талап-арыз бойынша кесілген қарызын өтеп жүр. Бұл алдағы уақытта шартты түрде мерзімінен бұрын босатылуына мүмкіндік береді.

Руслан Ким, жазасын өтеуші:

- Түзеу мекемесінде отырған 13 жылда пластик терезе жасауды, кірпіш құюды, саңырауқұлақ өсіруді, жарықдиодты шамдар құрастыруды, ағаш өңдеуді үйрендім. Мұның барлығы ертең өзім үшін керек дүниелер. Жұмыс істеген кезде уақыт та тез өтеді, ең бастысы – іштей тоқырау болмайды, керісінше дамисың, жаңа нәрселерді үйренесің. 

Бұл қатаң режимдегі түзеу мекемесіндегі мына цехта жарықдиодты шамның 15 түрі шығарылады. Дмитрий Ли жинақтаушы болып еңбек етеді. Ол бостандыққа шыққаннан кейін осы жұмысын жалғастыруды жоспарлап отыр.

Дмитрий Ли, жазасын өтеуші:

- Үйге қайтуыма сегіз ай қалды. Сондықтан осында өзімді жақсы жағынан көрсетуге, тәртіп бұзбауға, жұмыс істеуге тырысып жүрмін. Мұнда жұмыс істеп, заң негізінде кесілген қарызымды өтеп жатырмын. Қалада осындай жарықшамдар шығаратын зауыттар бар. Солардың біріне жұмысқа орналассам деймін. 

Бүгінде бұл түзеу мекемесінің аумағында он кәсіпорын жұмыс істейді. Мұнда тігін цехы, сыпырғыш, есік, баспалдақ, темірбетон бұйымдары, полимер плиталар өндірісі бар. Жазасын өтеушілер жұмысқа «Еңбек-Қарағанды» РМК-ны арқылы орналаса алады.

Иосиф Гертель, «Еңбек-Қарағанды» РМК учаске бастығы:

- Бізбен жұмыс істеуге ниетті кәсіпкерлер өте көп. Өйткені оларға бұл тиімді. Себебі жұмысшылар, бостандықта жүргендей емес, жалақы алып, жоғалып кетпейді. Болашақта мұнда, жаңа цехтар ашу үшін  қосымша нысандар салу жоспарланып отыр. 

Жалпы Қарағанды облысы мен Ұлытау облысындағы түзеу мекемелерінде шамамен бес мың адам жазасын өтеп жүр. Олардың екі мыңға жуығы жұмыспен қамтылған. Орташа жалақы 85 мың теңге. Табысымен талап-арыздар бойынша қарызын, алиментін өтейді. Қалғанын туыстарына беруіне, немесе өзінің арнайы шотына жинайды. 

Жүніс Әбдіқайыров, Қылмыстық атқару жүйесі департаменті бастығының орынбасары:

 - Бұның негізгі мақсаты –  қазіргі таңда түзеу мекемесіне сотталып келген азаматтарды жұмыс арқылы түзету. Оларды осы жұмысқа тарта отырып, өздерінің сотпен белгіленіп берілген атқару құжаттары болса, олар жеке тұлғаға болуы мүмкін, заңды тұлғаға болуы мүмкін және мемлекет пайдасына өндіру керек атқару парақтары болатын болса, соларды өндіріп және еңбек арқылы тәрбиелеп қайтадан қоғамға қосу.

Қарағанды мен Ұлытау облысы аумағындағы 10 түзеу мекемесі бар. Оларда 59 кәсіпкер жұмыс орнын ашқан. 

Авторлары: Руслан Нұрланұлы, Сайлау Игіліков, Аман Хамит