Жазға дейін күте тұрыңыздар : Сарапшылар пәтер сатып алуға асықпауға кеңес берді

Қазір Елордада жаңа пәтердің бағасы қарашада бірден 3,2% өсті. Пәтердің орташа құны бір шаршы метрі үшін 671 мың теңге. Ал Астананың қайталама нарығындағы өсім одан да көп – 4,8%. Астанадағы ескі тұрғын үйдің бір шаршы метрінің орташа бағасы 711 мың теңгеге жетті. Жалға берілетін пәтер бағасы бір айда 4% қосылды.

Алматыда шаһарында да бастапқы нарықтағы баға өсімі сезіліп жатыр. Қарашаның өзінде өсім 3,5%-ға жеткен. Бұл соңғы екі жылмен салыстырғандағы үлкен өсім. Жаңа үйлердегі тұрғын үйдің бір шаршы метрі 690,7 мың теңгеге бағаланып тұр, бұл – пәтердің орташа құны. Оның қасында қайталама нарықтағы баға сәл ғана көтерілген, бар-жоғы – 2,1%.  

Мамандардың айтуынша, жылжымайтын мүлік нарығындағы салық реформаларының ықпалымен туындаған ахуал жаз айларына таяу басылады. Сондықтан олар қазір пәтер алуға асықпауға кеңес береді. Бастысы бұл мәселенің неден туындағанын анықтау керек: құрылыс салушының жаңа ҚҚС-ты алдын-ала қосқан стратегиясы ма, әлде билік айтқандай салыққа еш қатысы жоқ, шынымен, нарықтық сұраныстың ұлғайуы ма?

Жылжымайтын мүлік жөніндегі маман Эльвира Сағандықова еліміз бойынша жаңа тұрғын үй бағасының жылдық өсімі +15,5% шамасында екенін атап өтті.

«Оның үстіне, баға өсімі жаңа құрылыстарда қатты сезіледі. Бұл дегеніміз – құрылыс салушылар алда болатын салық шығынын қосып, сатып алушылардың көңіл-күйімен ойнап отыр. Осыдан-ақ құрылысшылар өз өнімдеріне ҚҚС-ты қосып қойғанның белгісі» - дейді ол.

Жылжымайтын мүлік жөніндегі тағы бір маманның ойынша, бұл өсім  2026 жылы қосылатын ҚҚС-ты алдын алып, халықтың санасын үйренісуіне арналған қадам.

– Алдымыздағы жылда пәтердің қымбаттайтыны анық. Сондықтан құрылыс компаниялары өсімнің күрт болмас үшін стратегиялық түрде көтеріп жатқаны, – деді  Александр Бикетов.