Жазушы Зейнолла Сәніктің туғанына 90 жыл

Биыл этнограф-ғалым Зейнолла Сәніктің туғанына 90 жыл.

Мерейтойға орай Алматыда «Ата дәстүр, асыл сөз» атты әдеби-сазды кеш ұйымдастырылып, зиялы қауым өкілдері мен жас қаламгерлер жазушыны еске алды. Ғалымның өмірі мен шығармашылығына арналған көрме ашылды.

Жазушы, фольклоршы, баспагер, этнограф, аудармашы Зейнолла Сәнік Қытайдың Тарбағатай аймағында дүниеге келген. Өмірінің басым бөлігі «арғы бетте» өтті. Қоғамдық жұмыстан бөлек, жазушылыққа ден қойған қаламгердің әр шығармасының өз тағдыры бар,- дейді драматург Нұрғали Ораз. Тіпті автордың өзінің тағдырына тікелей әсер еткен әңгімелері де бар.

Нұрғали Ораз, жазушы, драматург:

- «Қасқыр мен бөрібасар» деген әңгімесі кәдімгідей саяси қуғын көрген әңгіме екен. Саясат қызық қой, көркем шығарманы да бұрмалап алады. Сондай саяси айыптар тағылған екен. Шын мәнінде бұл адамгершілікті насихаттайтын, мейірімді, қайырымды болуды айтатын әңгіме ғой. Міне, осындай тағдырлы жазушы.

2000 жылы тарихи Отанына оралған Зейнолла Сәнік Алматы қаласына қоныстанып, үздіксіз шығармашылық, зерттеу жұмыстарымен айналысты. Қазақтың этнографиясын зерделеп, оқырманға ұсынды.

Мереке Құлкенов, Қазақстан Жазушылар одағының төрағасы:

- Жазда Зейнолла Сәнік қоғамдық қайырымдылық қоғамымен бірігіп, Қазақстан Жазушылар одағы Мәдениет және ақпарат министрлігі қолдап, экспедицияға шыққанбыз. Экспедицияның ең басты мақсаты Зейнолла Сәнік деген жазушының еңбектерін бүкіл Қазақстанға таныстыру. Этнографияның не екенін білдіру. Осы тұрғыда біз бүкіл аймақты аралап шықтық.

Жазушының 90 жылдығы аясында көркем шығармалардың халықаралық байқауы ұйымдастырылған болатын. Мерейтойлық кеште байқау жеңімпаздары марапатталып, бағалы сыйлықтар табысталды. Жүлдегерлердің қатарында 24КZ телеарнасының жаңалықтар жүргізушісі Азамат Әбілқайыр да бар. 

Азамат Әбілқайыр, 24KZ телеарнасы жаңалықтар жүргізушісі:

- Бұл не береді? Бұл түптеп келген кезде әдебиетке тамшыдай болса да үлес қосады. Әр жанрдың жеке жеке қанат қағуына серпін береді. Соның ішінде өзім қалам сілтеп жүрген балалар әдебиетінің елеп ескерусіз қалатыны жасырын емес. Оны тек кітап жүзінде емес анимация комикс түрінде де жарық көруі тиіс деп есептеймін. Өйткені қазіргі буын көптеген ақпаратты визуалды қабылдағаннан кейін ол балаға дайын дүние ретінде ұсынылуы тиіс.

Зейнолла Сәніктің шығармашылығын насихаттауға бағытталған экспедиция жұмысы туралы фильм түсірілуде. Сондай-ақ жазушының «Қазақ этнографиясы» кітабы орыс тіліне аударылмақ. 

Авторлары: Гүлжан Көленқызы, Әбен Нарымбаев