Жекпе жек турнирінен кейін 18 жастағы қарағандылық спортшы жан сақтау бөліміне түсті

Қарағандыда 18 жастағы спортшы жекпе-жек турнирінде жарақат алып, комаға түсті. Оқиға 15 ақпанда, қала федерациясы ұйымдастырған жарыста болған.

Жарақат алған спортшының жақындары берген мәліметке сәйкес, белдесу барысында оның қарсыласы басымен төмен тастайтын тәсілді қолданған. Дегенмен, жекпе-жек тоқтатылмай жалғаса берген. Кейіннен жас спортшының жағдайы күрт нашарлап, ол басын ұстап, есінен танып қалған. Спортшыны алаңнан медициналық мекемеге жеткізген.

Жігіттің жақындары жарақат тыйым салынған тәсілді қолдану салдарынан алынуы мүмкін екенін алға тартты.

Сондай-ақ олар ұйымдастырушылық мәселелерге наразылықтарын білдіруде: олардың сөзінше, алаңда тек бір медициналық қызметкер ғана жұмыс істеп, қажетті реанимациялық құрал-жабдықтар болмаған, ал алаңда арнайы жедел жәрдем бригадасы кезекшілік етпеген.

Сонымен қатар, зардап шеккен спортшыны тасымалдау кезінде омыртқасы дұрыс бекітілмеген, ал отбасы оқиға туралы турнир ұйымдастырушыларынан емес, спортшының достарынан естіген.

Қарағанды облысы Денсаулық сақтау басқармасы спортшының жағдайы ауыр екенін хабарлады.

— Пациент жан сақтау бөлімінде жатыр. Оның жағдайы ауыр деп бағаланады, — делінген ведомство хабарламасында.

Қарағанды облысы Полиция департаменті тергеудің басталғанын растады.

— Аталған дерек бойынша Қылмыстық кодексінің 114-бабы бойынша алдын ала тергеу басталды. Қазіргі уақытта оқиғаның барлық мән-жайын жан-жақты және объективті анықтауға бағытталған қажетті тергеу іс-шаралары жүргізіліп жатыр, — деп хабарлады департаменттің баспасөз қызметі.

Қарағанды облысының Жекпе-жек федерациясы да пікір білдірді. Ұйым президенті Әділет Нұрмадиев тергеу органдары турнирге қатысты барлық материалды, соның ішінде бейнежазбалар мен құжаттарды алғанын айтты.

Оның айтуынша, тергеу нәтижесінде жарысты ұйымдастырушылардың әрекеттеріне құқықтық баға беріледі.

— Бізде бар ақпаратқа сүйенсек, спортшының өміріне қауіп жоқ, жағдайы тұрақты, оған барлық қажетті медициналық көмек көрсетіліп жатыр. Арсланның тезірек сауығып шығуын тілейміз, — деді Әділет Нұрмадиев.

Қарағанды облысы Дене шынықтыру және спорт басқармасы да өз тарапынан тексеру жұмыстарын жүргізетінін хабарлады және жағдай бақылауда екенін атап өтті.

Естеріңізге сала кетейік, бұған дейін резонанстық жанжалдан кейін Серік Сапиев Қарағанды облысы Дене шынықтыру және спорт басқармасының басшысы лауазымынан кеткенін хабарлаған болатынбыз.