Жел күшейіп, аяз болады: 21 қазанға ауа райы болжамы

Синоптиктердің хабарлауынша, ел аумағының басым бөлігінде ауа райына антициклон ықпал етеді. Біраз өңірде жауын-шашынсыз ауа райы сақталады.

Солтүстік-батыс циклоны шығыс бағытында жылжып, елдің батысында ғана жаңбыр жауады. Сондай-ақ республиканың солтүстігі мен шығысында жауын-шашын болады. 

Еліміздің оңтүстігі мен оңтүстік-шығысындағы таулы аймақтардағы фронтальды бөлімдердің әсерінен түнгі уақытта аздаған жаңбыр мен қар жауады. Республика бойынша жел күшейеді. Солтүстік пен оңтүстік-шығыстағы таулы аймақтарда тұман түседі.

Түнде Түркістан облысының солтүстігінде, Алматы және Қызылорда облыстарының таулы аудандарында 1-3 градус аяз болады.

— Маңғыстау облысында, Атырау облысының солтүстік-шығысында, оңтүстік-шығысында, Ақтөбе облысының оңтүстігінде, шығысында, Жамбыл облысының орталығында, Қызылорда облысының солтүстігінде, орталығында, Алматы облысының батысында, Қостанай және Ақмола облыстарының оңтүстік-батысында, Ұлытау облысының шығысында, орталығында, Абай облысының оңтүстігінде жоғары өрт қаупі сақталады, — делінген хабарламада.

Айта кетейік, бүгін Астана мен тағы 10 қалада ауа сапасы төмендейді.