Жер сатамын : Ақтөбе облысында тұрғындар алаяққа алданды

АСТАНА, 8 маусым – Sputnik. Ақтөбе облысында ер адам бірнеше азаматқа жоқ жер телімдерін сатып, ақша иемденіп кеткен. Бұл туралы облыстық полиция департаментінің баспасөз қызметі хабарлады.

Полицияның мәліметінше, облыс орталығынан жер сатып алмақ болған тұрғын алаяқтың арбауына түскен.

"Күдікті жер телімдерін төмен бағамен сатуға уәде беріп, азаматтардың ақшасын иемденіп кеткен. Жедел іздестіру іс-шаралары барысында полицейлер 37 жастағы ер адамды ұстады", – делінген Ақтөбе облысы полиция департаментінің хабарламасында.

Анықталғандай, күдіктінің өз иелігінде жер телімі болмаған. Қазіргі уақытта оның осыған ұқсас тағы үш алаяқтық дерегіне қатысы бар екені белгілі болды. Келтірілген жалпы материалдық шығын 5 миллион теңгеден асады.

Полиция "Алаяқтық" бабы бойынша сотқа дейінгі тергеу жүргізіп жатыр.