Жезқазғанда Халық қатысатын бюджет бойынша төрт жоба жүзеге асады

Келер жылы Жезқазғанда «Халық қатысатын бюджет» бағдарламасымен төрт жоба жүзеге асады.

Оған қала қазынасынан 130 миллион теңге жұмсалып, спорт алаңы және жаяу жүргіншілер жолы салынады. Аталған бағдарлама негізінде тағы қандай бастамалар іске асады?

«Халық қатысатын бюджет» бағдарламасы арқылы қала аумағын абаттандырып, жаян жүргіншілер жолы мен пандустарды жөндеп, ойын алаңдарын салуға болады. Сонымен қатар көпшілік тынығатын мәдени орындарды жарықтандыру қарастырылған. Бір ескеретіні - әр жобаға 59 млн-нан артық теңге жұмсалмауы шарт. 

Бибігүл Өмірзақова, экономика және қаржы бөлімінің жетекшісі:

- Тұрғындар тарапынан алты ұсыныс түсіп, соның төртеуі мақұлданды. Яғни 2026 жылы Алашахан көшесінде футбол алаңы, абаттандыру жұмыстары, Байқоңыров көшесінде жаяу жүргіншілер жолы мен модульды қоғамдық дәретханалар салынады. 

Әкімшілік қызметкерлері аталған бағдарламаға тұрғындардың қызығушылығы артып келеді, дейді. Себебі былтыр көпшіліктің өтінішімен балалар алаңы салынып, пайдалануға берілген. Қазір  жекіншектер жайлы әрі қауіпсіз жерде ойнайды. 

Елдос Түсіп, қала тұрғыны:

- Бұрын мына жерде ештеңе жоқ болғанда балалар батпақ кешіп, топырақ кешіп, үсті басын бүлдіріп, ойнайтын жері жоқ тұғын. Қазір, Құдайға шүкір, сол халықтың өтінішін әкімшілік іске асырып, осындай тамаша жобаларды аясында халыққа осындай тамаша ойын алаңдарын салып беріп жатыр. қаламыздың әрбір аулаларында. Қазір балаларды шығарып жіберіп қай жаққа барып ойнайды деп алаңдамайтын болдық. 

Бірнеше айдан соң «Халық қатысатын бюджет» бағдарламасына өтініш қабылданады. Тұрғындар әкімдік сайты арқылы ұсыныс жасай алады. Сараптама кеңесінен өтіп, көп дауыс жинаған жоба 2027 жылы іске асырылады. 

Шыңғыс Қалиден, Елизавета Шалина, Нурлан Исмаилов