Алматы облысы Кеген ауданында 43 ірі жоба жүзеге асады

Алдағы 3 жылда Алматы облысының Кеген ауданында 167 млрд теңге болатын 43 ірі жоба жүзеге асады.

Нәтижесінде жүздеген адам жұмыспен қамтылады. Жалпы кейінгі бір жылда аудан бюджеті 2 есе ұлғайып, әлеуметтік-экономикалық саланың даму қарқыны жақсарған. Ауылдағы ауыз су проблемасы да кезең-кезеңімен шешімін тауып жатыр, дейді жауаптылар. Сондай-ақ Кегеннің кереметін көруге келетін туристерге де қолайлы жағдай жасалады. 

Кереге таулы Кегенде  жүзеге асатын жобалардың көбі ауыл шаруашылығы, қызмет көрсету, инфрақұрылым және әлеуметтік сала сияқты бағыттарды қамтиды. Жобалар іске қосылған соң жүздеген тұрғын тұрақты жұмыспен қамтылады. Ауданында былтыр 15 жаңа әлеуметтік нысан салынып, ел игілігіне берілді.

Нұрбақыт Теңізбаев, аудан әкімі:

 - Атап айтып кететін болсақ, әлеуметтік саланың ішінде 6 медициналық пункттеріміз жаңадан облыстық құрылыс басқармасы арқылы салынды. 8 медпункт аудандық әкімшіліктің қаражатымен салынды. Жалпы тағы да біреуі ремонттан өтті. 

Көлсай келдеріне былтыр 600 мыңға жуық турист келсе, жалпы аудан аумағына 1 млн саяхатшы ат басын тіреген. Биыл Тұйық ауылындағы сарқырамаға электр желісі тартылып, Қайыңды көліне  апаратын жолға асфальт жабыны төселеді. Сонымен қатар «Көлсай 1» және «Көлсай 2» көлдеріне аспалы жол тартылады. Қара шатқалға шытынау эффектісі бар әйнек көпір салу жұмыстары басталып кетті. Жобаны жүзеге асыруға 3 млрд теңге көлемінде жеке инвестиция тартылды.

Айбек Оспанов, аудандық кәсіпкерлік бөлімінің басшысы:

- Аспалы көпір бойынша қазіргі уақытта автотұрақты тегістеп қойды, орнын тегістеп жатыр. Енді болашақта, осы биылғы жылы көпірді бастаймыз деп отыр. Туристер жылына 400 мыңнан 600 мыңға дейін келеді деп жоспарлап отыр. Көпірдің ұзындығы 200 метр болады. 

Жалағаш пен Жылысай ауылдарында  мәдениет үйі салынып, пайдалануға берілді. «Ел іші – өнер кеніші» демекші, бұл ауыл өнерпаздары мен шығармашылық ұжымдарына қуаныш сыйлады.

Баян Тойжанова, Жылысай ауылының тұрғыны:

- Біздің ауылға мәдениет үйі салынғалы екі айдың жүзі болып қалды. Сондай қуаныштымыз біз. Бізде медпункт салынып жатыр. Ауылдың көшелерін қандай көркейтіп жақсы жасады, светтер орнатты. Жақсы бізде жағдайымыз. Өте ризамыз. Ауылдың адамдарына жұмыс та табылып, жұмыс істеп жатырмыз. 

Сонымен қатар 6 білім беру нысаны ағымдағы жөндеуден өтті. Кегендегі мектеп-гимназияның материалдық-техникалық базасы  жаңартылды. Аудан өрендері облыстық, республикалық және халықаралық деңгейдегі спорттық бәсекелерде жақсы өнер көрсетіп жүр. Көкпаршылар үш жыл бойы облыс жеңімпазы атанса, волейболдан қыздар командасы үшінші мәрте өңір чемпионы болып, аудан намысын абыроймен қорғады.

Бауыржан Тәліп, аудандық балалар мен жасөспірімдер спорт мектебінің директоры:

- Қазіргі уақытта Кеген ауданында 12 ауылдық округінде 10 спорт түрінен спортпен айналысады. Оның жетеуі олимпиадалық спорт түрі, үшеуі ұлттық спорт түрлері. Жалпы 967 адам Кеген ауданы бойынша спортпен айналысады осы балалар мен жасөспірімдер мектебінде. 

Ауданда мал тұқымын асылдандыруға арналған жұмыстар жүріп жатыр. Ақтасты ауылындағы шаруашылық Австралия әдісі бойынша 1500 ірі қара ұстайды. Ал Қарқара ауылында тауарлы сүт фермасы жұмыс істеп тұр. Мұнда тәулігіне 2 тонна сүт өндіріледі.

Ардақ Айбарұлы, Аят Дүйсенбаев, Аманжол Жөңкешов