ЖИ дәуірінде жұмыс берушінің жауапкершілігі артады сарапшы

Әлеуметтік қорғау саласындағы халықаралық сарапшы, Вильнюс университеті ғылыми қызметкері Аудрюс Битинас еңбек қатынастарында цифрлық технологияларды қолданудың еуропалық тәсілін таныстырды.

Оның айтуынша, жасанды интеллект тәуекелдерді талдау мен инспекция жүргізуде белсенді қолданылып келеді. Алайда ол адамға тән маңызды факторларды ескере алмайды.

- Жасанды интеллект тәуекелдерді анықтау және тексерістер жүргізу үшін қуатты құрал болғанымен, ол күйзеліс, қорқыныш және тұлғааралық қатынастар сияқты негізгі адами факторларды ескермейді. Цифрландыру жағдайында да қызметкерлердің қауіпсіздігін қамтамасыз ету жауапкершілігі жұмыс берушінің мойнында қала береді. Еуропалық тәжірибе қызметкерлер құқықтарын қорғаудың қатаң талаптарына және алгоритмдердің ықпалын шектеуге негізделген. Бұл тек формалды келісіммен немесе өтемақымен шектелуге болмайтынын білдіреді. Жұмыс беруші еңбекті қорғау мен өнеркәсіптік қауіпсіздіктің тиісті деңгейін қамтамасыз етуге міндетті, - деді сарапшы.

Ол сондай-ақ Еуропалық одақта жасанды интеллектіні реттеу мәселелеріне тоқталды. Атап айтқанда, алгоритмдерді қолдануды бақылау және олардың қызметкерлердің жеке өміріне араласуына жол бермеу қажеттігін атап өтті.

Бұдан бөлек, ЕО елдерінде цифрлық экономика жағдайында, әсіресе өзін-өзі жұмыспен қамтығандар мен платформалық жұмыспен айналысатын азаматтарды әлеуметтік қорғау мәселелері талқыланып жатыр.

- Әлеуметтік қорғау, қауіпсіздік және әлеуметтік әріптестік жасанды интеллектіні енгізудегі негізгі элементтер. ЖИ-дің дамуы тек бақылау мен процестерді оңтайландыруға емес, сонымен қатар қызметкерлердің өмір сүру сапасын арттыруға бағытталуы тиіс, - деп түйіндеді ол.

Айта кетейік, еңбек қауіпсіздігін сақтамаған жұмыс берушілерге 428 млн теңгеден астам айыппұл салынды.