ЖИ камералары Астана Теміртау тас жолындағы ЖКО ға әкеп соқтырған жүргізушілердің қателіктерін көрсетті

Астана – Теміртау тасжолында жасанды интеллект элементтері бар камералар бірнеше соқтығысуды тіркеді, деп хабарлайды Tengri Auto.

Бейнежазбалардан жүргізушілердің жолдағы жағдайға назар аудармай, тежегішті баспастан соқтығысқаны көрінеді.

Мәселен, алғашқы кадрларда 12 тамызда Hyundai жүргізушісі жолақ ауыстыру кезінде алдында келе жатқан жүк көлігінің артқы жағына соғылғаны байқалады.

Жол камераларынан алынған екінші бейнеде 30 тамызда Chevrolet маркалы автокөлік жолдан шығып кетіп, жол жиегіндегі конструкцияға соғылған.

"ҚазАвтоЖол" өкілдері жүргізушілердің ұйқысы келуі немесе смартфонға алаңдауы салдарынан зейінін жоғалтуы мүмкін екенін атап өтті. Жол-көлік оқиғаларының мән-жайын полиция қызметкерлері анықтайды.

Компания мәліметінше, екі жағдайда да адам шығыны болған жоқ.

"Бұл кадрлар жол үстіндегі бірнеше секундтық алаңдаушылықтың өзі қаншалықты қауіпті екенін көрсетеді. Жоғары жылдамдықпен келе жатқан көлік бірнеше секундтың ішінде ондаған метр қашықтықты жүріп өтеді. Мұндай жағдайда жүргізушінің қауіпті байқап, дер кезінде әрекет етуіне және соқтығыстың алдын алуына мүмкіндік азаяды", - деп атап өтті "ҚазАвтоЖол" компаниясының өкілдері.

Естеріңізге сала кетейік, былтыр Қазақстан жолдарында шаршаған жүргізушілерді анықтауға арналған дрондар іске қосылған болатын. ІІМ ресми өкілі Шыңғыс Әлекешев жұмыс алгоритмін түсіндірді: дрондар қауіпті жүргізушілерді, сондай-ақ көлік тізгінінде сегіз сағаттан артық отырғандарды анықтайды.

"Алгоритм келесідей: егер көлік сегіз сағаттан астам уақыт тоқтаусыз қозғалса, дрон көліктің жолда тым ұзақ келе жатқаны туралы белгі береді", - деді Әлекешев ІІМ-де өткен пресс-тур кезінде.

Осыдан кейін патрульдік полиция көлікті тоқтатып, жүргізушінің жағдайын тексереді.

"ҚазАвтоЖол" мәліметінше, республикалық маңызы бар жолдардағы апат саны 5,2 пайызға - 1214-тен 1151 жағдайға дейін азайды. Зардап шеккендер саны 8,2 пайызға - 2376-дан 2181 адамға дейін қысқарды.

Апаттың айтарлықтай азаюы Астана – Щучинск және Астана – Қарағанды учаскелерінде тіркелді. 2025–2026 жылдардың қысқы кезеңінде мұнда 27 ЖКО болды, ал бір жыл бұрын бұл көрсеткіш 57 болған.

Сондай-ақ есепті кезеңде жолдың осы бөліктерінде адам өлімі тіркелген жоқ, ал 2024–2025 жылғы қыста апаттардан тоғыз адам қаза тапқан.

Google News арқылы жаңалықтарымызды қадағалаңыз