ЖИ компанияларының акциялары олардың басшыларының мәлімдемесінен кейін күрт төмендеді

Жасанды интеллектіні дамытумен айналысатын әлемдік компаниялардың акциялары сала басшыларының даму қарқынын бәсеңдету туралы үндеулері фонында төмендеп жатыр, деп хабарлайды Tengrinews.kz Reuters агенттігіне сілтеме жасап.

Жаһандық технологиялық нарықтар шығынға батты: жасанды интеллект саласындағы топ-менеджерлердің ЖИ-дің ықтимал экзистенциалды қауіптері туралы мәлімдемелерінен кейін осы салаға қатысты компаниялардың құнды қағаздары арзандады. Бұл инвесторлардың сеніміне және индекстерді рекордтық деңгейге көтерген секторға соққы болып тиген.

Уолл-стритте Nasdaq 100 индексі бір сәтте 1,2 пайызға - кейінгі алты аптадағы ең төменгі көрсеткішке дейін төмендеп, сауда-саттық соңында 0,4 пайыздық құлдыраумен жабылды. Әсіресе чип өндірушілердің акциялары айтарлықтай арзандаған.

"Егер бұл ЖИ-ге жұмсалатын шығындардың біршама бәсеңдеуіне және қайта қаралуына әкелсе, оның экономика мен қор нарығының кейбір маңызды секторларына салдары болады. Өйткені, негізінен, біз ЖИ шығындарының арқасында айтарлықтай табысқа қол жеткіздік", - деді Interactive Brokers компаниясының нарық бойынша бас талдаушысы Стив Сосник.

Anthropic бас директоры Дарио Амодей X әлеуметтік желісіндегі эссесінде ЖИ-ді теріс мақсатта пайдалану қаупіне байланысты модельдердің мүмкіндіктерін арттыруды бәсеңдетуге шақырды. Оны Илон Маск (xAI) пен Сэм Альтман (OpenAI) қолдады. Сондай-ақ Альтман қауіпсіздік мақсатында биыл OpenAI компаниясының IPO-сы өтпейтінін мәлімдеді.

"Алты-он екі айдан кейін ЖИ агенттері бүкіл интернетті басып алып, жүздеген миллиард доллар шығын келтіруі мүмкін", - деп жазды Амодей.

Бұған қоса, Альтман ЖИ-ден келетін адамзаттың жойылып кету қаупі өте жоғары екенін, сондықтан компаниялар мен үкіметтер тиісті қадамдар жасауы керектігін ескертті.

Зерттеуші-антрополог Джейкоб Коксонның ЖИ алпауыттары "біздің өмірімізбен ойнап жатыр" деп мәлімдеп, қызметінен кеткенінен кейін алаңдаушылық күшейе түсті. Anthropic компаниясы қауіптер туралы есеп жариялап, онда Claude AI-ды қару жасау мен кибернетикалық операциялардан бастап, бақылау және алаяқтықпен күреске дейінгі салаларда қолдану жағдайларын көрсеткен.

"Бұл ескертулерге байыппен қарау керек. Модельдердің біз қаламайтын және алдын ала болжау қиын әрекеттерді жасау қаупі бар", - деді Джонс Хопкинс университетінің профессоры Джиллиан Хадфилд.

АҚШ-та сенаторлар ЖИ компанияларын сақтық шараларын көрсетуге міндеттейтін заң жобасын талқылап жатыр. Сонымен қатар АҚШ президенті Дональд Трамп бұл қауіптерді ЖИ мен дата-орталықтарға қарсы бағытталған "қаскөйлік қастандық" деп атады.

Reuters агенттігінің мәліметінше, АҚШ пен Қытай осы айда екіжақты келіссөздерде ЖИ қауіпсіздігі мәселесін талқылайды.

Инвесторлардың бір бөлігі мұндай үрейлі мәлімдемелерге мән бермей отыр.

"Компаниялар мен елдер арасындағы бәсекелестік әлі де өте шиеленісті. Бәсекелестер алға жылжып жатқанда, фирмалардың өз еркімен кері шегінетінін елестету қиын", - деп атап өтті Deutsche Bank сарапшылары.

Кейбір сарапшылардың пікірінше, бұл мәлімдемелер өсімнің нақты бақылаусыз бәсеңдеуін жасыру үшін жасалған бүркеме болуы мүмкін.

Бізді Google-дың негізгі дереккөздер тізіміне қосыңыз