ЖИ қауіпсіздікті бақылайды

Шығыс Қазақстан облысының IT-мамандары жасанды интеллекттің көмегімен қар көшкінінің болатынын хабарлайтын жаңа жүйені іске қосты.

Қазірдің өзінде қауіп туралы хабар беретін құрылғылар таулы аймаққа орнатылған. Өнертапқыштар металлургтер мен шахтерлердің де қауіпсіздігін назардан тыс қалдырмай, жаңа бағдарлама ойлап тапты. 

Шығыс Қазақстан облысының таулы аймағында қар көшкіні болатын 300-ден аса қауіпті нүкте бар. Енді бұл аумақ жасанды интеллекттің бақылауында. Цифрлық бағдарлама ауа температурасы мен өзге де жағдайларды есепке алып, қауіп туралы операторға жедел хабарлап отырады. Осылайша, жолдарды дер кезінде жауып, оқыс оқиғаның алдын алуға жәрдемдеседі. Профессор Наталья Денисованың бұл жобасы тәжірибеден сәтті өтті. Ал ІТ-маман Руслан Четтыкбаев шахтерлерге арналған маңызы зор бағдарлама әзірлеп жатыр.

Мына виртуалды жаттықтырушы шахталардағы еңбек қауіпсіздігін сақтауға мүмкіндік береді. Бағдарламада шахтаның шағын үлгісі көрсетілген. Әр қызметкер осы ойын арқылы қауіпсіздікті сақтауға арналған түрлі кезеңнен өтеді. Биыл өңірдегі кәсіпорындарда 89 оқыс оқиға тіркелген. Оның басым бөлігі жұмысшылардың қауіпсіздік ережелерін сақтамауынан болған. Сол себепті өңір ғалымдары өндірістегі техникалық қауіпсіздікті үйрететін осындай бағдарлама ойлап тапқан. Руслан Четтыкбаевтың жаңа туындысы шетелдік өнімдерге қарағанда 5 есе арзан. Ол бағдарламаны өндіріске енгізуге дайын.

Руслан Четтыкбаев, IT маманы:

- Шетелде мұндай бағдарламалар өте қымбат тұрады. Біздің жобамыз құрылымы жағынан олардан кем емес. Әлдеқайда арзан және тиімді нұсқаны әзірледік.

Бұл бағдарлама бейнебақылау жүйесі арқылы жұмысшылардың қауіпсіздік құралдарын қалай қолданып жүргенін анықтай алады. Ереже сақталмаса, операторға дереу хабарлайды.

Мұхаммед Төлегенов те өндіріс барысын бақылауға жасанды интеллекттің мүмкіндіктерін тиімді пайдаланып жүр. Шынында кәсіпорындағы қауіпсіздік өте маңызды. Сарапшылардың айтуынша, алдағы үш жылда отандық компаниялардың 80 пайызы жасанды интеллекті өндіріске енгізеді. Бұл жұмысты оңтайландырып, 100 млн долларға дейін үнемдеуге мүмкіндік береді,- дейді олар.

Авторлары: Асланбек Шығыр, Вячеслав Ветлугин, Дмитрий Пыхтин