Жолаушылар Нұрлы жол вокзалындағы аптап ыстыққа шағымданды ҚТЖ мәселені мойындады

Елордада ауа температурасы +31 градусқа дейін көтерілді. Жолаушылар Астанадағы "Нұрлы жол" теміржол вокзалында кондиционерлердің істемей тұрғанына шағымданды. "Қазақстан темір жолы" компаниясы бұл мәселені растап, себебін түсіндірді, деп хабарлайды Tengri Travel.

Ақау себебі неде?

Әлеуметтік желілерде жолаушылар "Нұрлы жол" вокзалы ғимаратындағы ыстыққа шағымдана бастады. Келушілердің айтуынша, үй-жайларда кондиционерлер жұмыс істемей тұр.

"Қазақстан темір жолы" ҰК" АҚ вокзал ғимаратында кондиционерлеу және желдету жүйелерінде ақау шыққанын растады. Себебі - жабдықтарға техникалық қызмет көрсету дер кезінде жүргізілмеген.

"Техникалық қызметті уақтылы көрсетпеген мердігер ұйыммен талап-арыз жұмыстары жүргізіліп жатыр. Сонымен қатар қолданыстағы кондиционерлеу және желдету жүйелеріне күрделі жөндеу жүргізу мәселесі қарастырылып жатыр", - деп хабарлады компания.

ҚТЖ жолаушылар мен шығарып салушылардан кешірім сұрады, алайда кондиционерлер жұмысы қашан толық қалпына келетінін нақтыламады.

Бұл Нұрлы жол вокзалының жағдайына қатысты алғашқы шағым емес. Бұған дейін жолаушылар әжетханалардың ластығына назар аударған болатын. Ол кезде желіде қолжуғыштардағы дақтар, лас еден мен туалеттер түсірілген суреттер жарияланған еді.

Сол кезде ҚТЖ тазалық жұмыстары сағат сайын жүргізілетінін мәлімдеп, мәрмәр бетіндегі сарғыш дақтарды материалдың табиғи тозуымен түсіндірген. Сонымен қатар компания санитарлық тораптарды жаңа дизайн-жоба бойынша кезең-кезеңімен жөндеу басталғанын хабарлаған.

Бұған дейін билік пен ҚТЖ елорданың теміржол инфрақұрылымын жаңғыртуға қаражат бөлінетінін мәлімдеген, бірақ әңгіме "Астана-1" вокзалы туралы болған еді.

Еске сала кетейік, елордада аталған вокзалды ауқымды жаңғырту жүргізіліп жатыр. Tengrinews.kz тілшілері наурызда нысанға барып, оның қазіргі жаңдайын көрсеткен болатын. "Астана-1" вокзалын жаңғырту жұмыстарын 2026 жылдың аяғына дейін бітіру жоспарланған.

Жалпы алғанда, 2026 жылдың аяғына дейін ҚТЖ 120-дан астам теміржол вокзалын жөндеуді жоспарлап отыр.

Google News арқылы жаңалықтарымызды қадағалаңыз