Жолаушылардың қаперіне Қазақстан поездарындағы шу мен қатты музыка үшін қандай жаза қарастырылған

Жаз мезгілі дәстүрлі түрде саяхат маусымы саналады. Көптеген қазақстандық пойызбен қатынайды, алайда ережелерді бұзу сапардың сәнін бұзып қана қоймай, айыппұлдарға да әкеп соғуы мүмкін. Жолаушыларға жолға шықпас бұрын нені білу маңызды екенін айтып береміз, толығырақ - Tengri Travel материалында.

Жаз мезгілі дәстүрлі түрде саяхат маусымы саналады. Көптеген қазақстандық пойызбен қатынайды, алайда ережелерді бұзу сапардың сәнін бұзып қана қоймай, айыппұлдарға да әкеп соғуы мүмкін. Жолаушыларға жолға шықпас бұрын нені білу маңызды екенін айтып береміз, толығырақ - Tengri Travel материалында.

"Қазақстан темір жолы" компаниясы жолаушыларға жауапкершілік қарастырылған жиі кездесетін заңбұзушылықтар туралы ескертті.

Түнгі уақытта тыныштықты бұзу

Түнгі уақытта шулау ереже бұзу болып саналады. Мәселен, қатты музыка, айқай-шу, дауыс көтеріп сөйлесу және жолаушылардың демалуына кедергі келтіретін басқа да әрекеттер жауапқа тартуға негіз болуы мүмкін.

"Сапар барлық жолаушыға жайлы болуы тиіс. Сондықтан заңнамада түнгі уақытта азаматтардың тыныштығын бұзғаны үшін жауапкершілік қарастырылған. Айыппұл мөлшері - 5 АЕК (2026 жылы 21 625 теңге). Негіздеме: ӘҚБтК-нің 437-бабы", - деп ескертті баспасөз қызметі.

Анықтама: Тыныштықты бұзу дегеніміз - жұмыс күндері сағат 22:00-ден 09:00-ге дейін, ал демалыс және мереке күндері 23:00-ден 10:00-ге дейін тыныштық сақтамау.

Пойыздарда және вокзалдарда темекі шегу

Қолданыстағы тыйымға қарамастан, вокзалдарда темекі шегу ең жиі кездесетін заңбұзушылықтардың бірі.

"Электрон темекілер мен вейптер кең таралғанына қарамастан, оларды жолаушылар вагондарында пайдалануға тыйым салынған. Шектеу темекіге, кальяндарға, никотинді тұтынудың электрон жүйелеріне және басқа да темекі өнімдеріне де қолданылады. Пойыздарда және вокзалдардың белгіленбеген жерлерінде темекі шеккені үшін 15 АЕК (2026 жылы 64 875 теңге) мөлшерінде айыппұл қарастырылған. Бір жыл ішінде қайталап бұзу 20 АЕК (86 500 теңге) мөлшерінде айыппұлға әкеп соғады. Негіздеме: ӘҚБтК-нің 441-бабы", - деп ескертті компания.

Ішімдік ішу және қоғамдық тәртіпті бұзу

Компания қоғамдық орындарда алкогольді ішімдіктер ішу, сондай-ақ мас күйде жүру әкімшілік құқық бұзушылық екенін еске салды.

"Мұндай заңбұзушылық үшін 5 АЕК (2026 жылы 21 625 теңге) мөлшерінде айыппұл қарастырылған. Бір жыл ішінде қайталап бұзған жағдайда айыппұл 10 АЕК-ке (43 250 теңге) дейін артады немесе бес тәулікке дейін әкімшілік қамауға алу шарасы қолданылуы мүмкін. Сонымен қатар, жолаушы билет құны қайтарылмастан пойыздан түсіріледі. Негіздеме: ӘҚБтК-нің 440-бабы", - деп хабарлады баспасөз қызметі.

Теміржол жолдарын белгіленбеген жерден кесіп өту

Компания теміржол жолдарын арнайы жабдықталған өткелдерден тыс жерде кесіп өтуді ең қауіпті заңбұзушылықтардың бірі деп атады.

"Мұндай әрекеттер адамның өмірі мен денсаулығына қауіп төндіреді. Жолдарды белгіленбеген жерден кесіп өткені үшін 3 АЕК (12 975 теңге) мөлшерінде айыппұл қарастырылған. Қазіргі уақытта бұл заңбұзушылық үшін ескертусіз әкімшілік жаза қолданылады. Негіздеме: ӘҚБтК-нің 559-бабы 5-бөлігі", - деді компания өкілдері.

Стоп-кранды негізсіз пайдалану

Бұл механизм тек жолаушылардың қауіпсіздігіне немесе пойыздардың қозғалысына нақты қауіп төнген төтенше жағдайларға арналған.

Оны қажет болмаса, кез келген қолдану жағдайы пойыздардың кешігуіне және қозғалыс кестесінің бұзылуына әкеледі.

"Пойызды өз бетінше тоқтатқаны үшін 5 АЕК (21 625 теңге) мөлшерінде айыппұл қарастырылған. Негіздеме: ӘҚБтК-нің 560-бабы", - деп ескертті компания.

Сапар кезінде осы қарапайым ережелерді сақтау айыппұлдардан аулақ болуға және саяхатты барлық жолаушы үшін жайлы әрі қауіпсіз етуге көмектеседі.

Google News арқылы жаңалықтарымызды қадағалаңыз

Жазылу