Дәрігерлерді қорқытқаны үшін қандай жаза кесіледі

АСТАНА, 26 қараша – Sputnik. Ішкі істер министрлігі жаңа заң бойынша дәрігерлер мен жедел жәрдем жүргізушілерін қорқытқаны үшін жаза тағайындау тәртібін түсіндірді, деп хабарлайды Sputnik Қазақстан тілшісі.

Министрдің орынбасары Санжар Әділовтың айтуынша, дәрігерлерді қызметтік міндетін орындау кезінде қорқытса, жаңа баптың санкциясы қолданылады.

"Қылмыстық процестің ережелеріне сәйкес, адамның қолында пышақ болса немесе қолмен ұрамын десе, дәрігер мен жедел жәрдем жүргізушісінің өмірі мен денсаулығына шынымен де қауіп төнеді. Ал жай ғана сөз болып, адам өміріне қауіп төнбеген жағдайда басқа бап бойынша құқықтық баға беріледі. Біз әрбір жағдайды жан-жақты зерделейміз", - деп атап өтті Әділов.

Ал жұмыстан тыс уақытта болған оқиғалар басқа баппен сараланады.

Жаңа баптың жазасы қандай

Заң жобасында медицина қызметкерлері мен жедел жәрдем жүргізушілерін қорықшылармен бірдей қорғау ұсынылып отыр. Өміріне қауіпті емес күш қолдану не күш қолдану қатерін төндіру әрекеті үшін қарастырылған жаза:

500-1000 АЕК-ке (2025 жылы 1,9-3,9 млн теңге) дейінгі айыппұл;

сол сомаға сай түзеу жұмыстары;

600 сағатқа дейінгі мерзімге қоғамдық жұмыстарға тарту;

үш жылға дейiнгi мерзiмге бас бостандығын шектеу;

сол мерзімге бас бостандығынан айыру.

Ал дәрігерлердің денсаулығына орташа немесе ауыр зиян келтіргені үшін 12 жылға дейін бас бостандығынан айыру ұсынылған.

Бүгін депутаттар заң жобасын бірінші оқылымда қабылдады. Екінші оқылымға дейін тағы өзгерістер енгізілуі мүмкін.