Жұмыс берушілер үшін жаңа сервис іске қосылады

Қазақстанда жұмыс берушілердің салық және әлеуметтік төлемдер бойынша есеп жүргізуін жеңілдететін жаңа цифрлық сервис әзірленуде.
Бұл жоба Премьер-министрдің орынбасары – Ұлттық экономика министрі Серік Жұманғариннің төрағалығымен өткен Салық кодексін енгізу жөніндегі жобалық кеңсе отырысында таныстырылды.

Жаңа сервис Мемлекеттік кірістер комитеті әзірлеп жатқан Салық төлеуші кабинеті платформасына енгізіледі. Оның көмегімен жұмыс берушілер еңбекақы қорына қатысты барлық міндетті салықтар мен әлеуметтік төлемдерді бір батырманы басу арқылы автоматты түрде есептеп, төлем құжаттарын банкке жолдай алады.

Қазіргі уақытта жұмыс берушілер қызметкерлер үшін бірнеше түрлі әлеуметтік төлемді бөлек есептеп, рәсімдеуге мәжбүр. Жаңа жүйе қызметкерлердің мәртебесін, қолданыстағы жеңілдіктер мен арнайы санаттарды автоматты түрде ескеріп, барлық есептеуді өзі жүргізеді.

Сервис мемлекеттік ақпараттық жүйелермен интеграцияланады. Сондай-ақ жұмыс уақытын есепке алу табелін жүргізу мүмкіндігі қарастырылып, оның негізінде қажетті төлемдер автоматты түрде есептеледі.

Мамандардың айтуынша, бұл жаңашылдық шағын және орта бизнеске түсетін әкімшілік жүктемені едәуір азайтып, кейбір есептілік түрлерін, соның ішінде 200.00 нысанын тапсыру қажеттілігін қысқартуы мүмкін.

Жандос Дүйсембиев сервисті пайдалану ерікті негізде жүзеге асырылатынын мәлімдеді. Алғашқы кезеңде жүйе шағын және орта бизнес үшін қолжетімді болады, кейін бухгалтерлік бағдарламалармен біріктіріліп, ірі кәсіпорындарға да ұсынылады.

Жоба биылғы қыркүйек айында пилоттық режимде іске қосылады. Егер сынақ кезеңі сәтті өтсе, сервис 2027 жылдың қаңтарынан бастап толыққанды пайдалануға беріледі.

Үкіметтің пікірінше, жаңа жүйе есеп жүргізудегі қателіктерді азайтып, әлеуметтік төлемдердің ашықтығын арттыруға және бизнеске түсетін жүктемені жеңілдетуге мүмкіндік береді.