Жұмыскерлер мен жұмыс берушілерге скринингтен өту туралы хабарлама жіберіледі

АСТАНА, 21 шілде – Sputnik. Денсаулық сақтау министрлігі міндетті медициналық тексерулер мен скринингтік зерттеулер жүргізу қағидаларына өзгерістер енгізуді жоспарлап отыр.

Ведомство "Ашық НҚА" порталында 2020 жылғы құжатқа енгізілетін түзетулер туралы бұйрық жобасын жариялады. Құжатта медициналық тексеруден өтуге міндетті азаматтардың нысаналы топтары және тексерулерді өткізу тәртібі белгіленген.

Өзгерістер бірқатар заңнамалық актіге енгізілген түзетулерге байланысты әзірленді. Атап айтқанда, олар:

2026 жылғы 9 қаңтардағы сәулет, қала құрылысы және құрылыс мәселелері бойынша өзгерістер енгізу туралы заң;

2026 жылғы 9 қаңтардағы цифрландыру, көлік және кәсіпкерлік салалары бойынша өзгерістер енгізу туралы заң;

2026 жылғы 3 маусымдағы еңбек заңнамасын жетілдіру мәселелері бойынша өзгерістер енгізу туралы заң.

Бұйрық жобасына сәйкес, жұмыскерлер мен жұмыс берушілерге скринингтік зерттеулерден өту қажеттілігі туралы хабарламалар жіберіледі. Бұл қызметкерлердің міндетті медициналық тексеруден уақытылы өтуіне қызығушылығын арттыруға бағытталған.

Денсаулық сақтау министрлігінің пікірінше, жаңа нормалар азаматтарды міндетті медициналық тексеруден дер кезінде өтуге ынталандырып, профилактикалық шаралардың тиімділігін арттырады.

Құжат жобасы 22 шілдеге дейін қоғамдық талқылауда болады.