Жұмыс берушілерге қызметкерді келісімшартпен алуға тыйым салынбақ

Бұдан былай жұмыс берушілерге қызметкерлерін келісімшартпен алуға тыйым салынбақ. Бұл туралы бүгін Мәжілісте айтылды.

Депутаттардың мұндай мәселені көтеруіне жұмыс берушілердің қаржысын үнемдеп, қызметкерлеріне әлеуметтік көмек көрсетпеуі себеп. Артық ақша жаратпауды ойлаған көп мекеме қазір жұмысшыларымен еңбек шартын жасауды қойған. Оның орнына азаматтық құқықтық шарт жасасады. Соның салдарынан қызметкерлер бірқатар әлеуметтік кепілдіктен айырылып отыр. Атап айтқанда, еңбек демалысына шыға алмайды. Зейнетақы жарнасы аударылмайды. Медициналық сақтандыру да болмайды. Жүктілікке шыққан әйелдерге демалыс берілмейтіні тағы бар. Депутаттар енді еңбек заңнамасына толықтырулар мен түзетулер енгізу арқылы бұған тосқауыл қоямыз деп отыр.

Асхат Аймағамбетов, ҚР Парламенті Мәжілісінің депутаты:

- Егер қарым-қатынаста еңбек шартының кем дегенде бір белгісі болса, онда азаматтық-құқықтық шарт жасасуға тыйым салынады. Нәтижесінде он мыңдаған адам толыққанды әлеуметтік кепілдіктерге ие болады. Біз оны қамтамасыз етеміз. Қорытындылай келе, біз ұсынып отырған әрбір норма – тек заңдық түзету емес, бұл әділдікке деген үлкен қадам.