Жүргізуші куәлігін сатып алмақ болған қыз сотқа жүгінуге мәжбүр болды

АСТАНА, 4 наурыз – Sputnik. Батыс Қазақстан облысы Тасқала ауылының тұрғыны емтихансыз жүргізуші куәлігін алмақ болып, алаяққа алданып қалған, деп хабарлайды облыстық сот.

Жәбірленуші өзіне жүргізуші куәлігін алуға көмектесетін әйел туралы әріптесінен естіп, оған телефон арқылы хабарласқан.

"Екеуі өзара келіскен соң, көмегі үшін алдын-ала 385 000 теңгені екі бөліп аударған. Алайда уәде етілген қызмет көрсетілмей, ақшаны алған әйел байланысқа шықпай қойған. Алданған қыз полицияға арыз жазуға мәжбүр болған", - дейді сот.

Күдікті ретінде 38 жастағы әйел ұсталды. Ол - Орал қаласының тұрғыны, қылмысқа ақшаға мұқтаж болғандықтан барғанын түсіндірген.

Сотталушы кінәсін мойындап, өкінетіндігін айтқан. Сондай-ақ оның асырауында кәмелетке толмаған балалары бар екені ескерілді. Тасқала аудандық соты алаяқтық жасағаны үшін кінәлі деп танып, жазасының барлық мерзіміне пробациялық бақылау белгілеумен бір жылға бас бостандығынан шектеу жазасын кесті. Бұған қоса сотталған әйел жәбірленушінің ақшасын қайтаруға міндеттелді.