Шымкентте жүргізуші куәлігін сатып алмақ болғандар сан соғып қалды

Шымкентте полиция қызметкерлерінің көмегімен жүргізуші куәлігін алып беруге уәде беріп, бірнеше рет интернет-алаяқтық жасады деген күдікті құрықталды.

Тергеу мәліметтері бойынша, күдікті алдау схемасын TikTok әлеуметтік желісі арқылы ұйымдастырған. Арнайы ашылған парақшада ол жүргізуші куәлігін жеделдетіп ресімдеу «қызметтерін» жарнамалап, құжатты тез әрі кепілді түрде алып беруге уәде берген. Клиенттерді тарту үшін сенімді форматтағы бейнероликтер мен хабарландырулар пайдаланылған.

Полицияның хабарлауынша, осы уәделерге сенген азаматтар ақша аударған. Алдын ала мәлімет бойынша, күдіктінің әрекетінен 45-ке жуық адам зардап шегіп, жалпы шығын көлемі 20 миллион теңгеден асқан.

Жедел-іздестіру шаралары барысында ер адам ұсталып, қамауға алынды. Қазіргі уақытта тергеу амалдары жүргізіліп жатыр, құқық қорғау органдары оның басқа да қылмыстық эпизодтарға қатысы бар-жоғын анықтауда.

Полиция өкілдері заңда белгіленген тәртіптен тыс «жеделдетілген» немесе «кепілді» құжат алып беру туралы кез келген ұсыныс алаяқтықтың белгісі екенін баса айтты.

Азаматтарды қырағы болуға, күмәнді онлайн-хабарландыруларға сенбеуге және бейтаныс тұлғаларға ақша аудармауға шақырады.

Бүгін, 15:20