Жыл басынан бері өндірісте 133 адам көз жұмды

2025 жылғы 1 қазанға дейін Қазақстанда өндірістегі жазатайым оқиғалар салдарынан 934 адам зардап шегіп, оның ішінде 133 адам көз жұмған, деп хабарлайды Arasha.kz Еңбек және халықты әлеуметтік қорғау министрлігінің баспасөз қызметіне сілтеме жасап.

«Қазақстан Республикасының Еңбек және халықты әлеуметтік қорғау министрлігі Еңбек мемлекеттік инспекциясы комитетінің деректеріне сәйкес, 2025 жылғы 1 қазанға дейін өндірістегі жазатайым оқиғалардан 934 қызметкер зардап шегіп, олардың 133-і қаза тапқан. Сонымен қатар биылғы жылдың тоғыз айының қорытындысы бойынша өндірістік жарақаттану деңгейі өткен жылдың осындай кезеңімен салыстырғанда 3,4%-ға төмендеген», – делінген хабарламада.

Жартыжылдық қорытынды бойынша жазатайым оқиғалардың жиілік коэффициенті әрбір мың қызметкерге шаққанда 0,13 көрсеткішін құраған.

Өндірістік жарақаттану деңгейі еліміздің өнеркәсіптік аймақтарында әлі де жоғары. Атап айтқанда, Қарағанды облысында – 103, Шығыс Қазақстанда – 89, Павлодарда – 68, Ақтөбеде – 64, Атырауда – 48 адам зардап шеккен. Алматыда 51 оқиға тіркелген.

Жазатайым оқиғалардың ең көбі тау-кен металлургия кешенінде (17,4%) және құрылыс саласында (10,2%) орын алған.

Оқиғалардың негізгі себептері – жұмыстарды қанағаттанарлықсыз ұйымдастыру (34,2%), қызметкерлердің абайсыздығы (33,6%), еңбек қауіпсіздігі ережелерін бұзу (8,5%) және жол қозғалысы ережелерін сақтамау (7,8%).

Құқық қорғау органдарына 730 істің материалдары жолданып, олардың 211-і бойынша қылмыстық іс қозғалған.