Жылыой ауданында мал суаратын жер тапшы

Жылыой ауданында мал суаратын жер тапшы. Жергілікті шаруалардың айтуы бойынша Жем өзенін тереңдетіп, арнасын кеңейту кезінде суаттар жабылып қалған.

Өзен түбінен алынған топырақты шығарып, жағаны биіктетіп тастаған. Салдарынан төрт-түлік суға жете алмай жүр. Шаруалардың өтініші бойынша әзірге  2 суат ашылған. «Алайда бұл аз, қыста мал суару қиындайды» - дейді малшылар.

Тасқыннан қорғану үшін Жем өзенінің арнасы кеңейтілді, түбі тереңдетілді, жағасы дәл осылай бекітілді. Бірақ өзен бойын жағалаған шаруалар үшін бұл қолайлы болмады. Өйткені дәл осындай тік жарқабақтан мал өте алмайды, суатқа жете алмайды.

Шаруалар жобаның дұрыс дайындалмағанын айтады. Өйткені малдың суатқа барар тұсы тым биік. Ал ойпаң жерден түскен мал ұйыққа жығылады. «Шілде-тамыз айларында ондаған мал өлді»,- дейді шаруалар.

Сафи Шудабаев, шаруа:

- Арғы жағында да бергі жағында да елді мекен бар. Мал деген былай-былай өтеді. Ал мына жер деген тіпті биік. Мал өлімі осыдан көп болып жатыр. Салынған бөгеттің тұсынан мынадай биік, тіке жарқабақ салған. Содан малдарымыз өліп жатыр. Оның есебі жоқ.

Маран Балықбай, шаруа:

- Түп тереңдету жұмысы қарқынды жүрген қарыста Жемнен шығатын өзек, сай-саланың бәрі бітеліп кетті. Енді осының әсерінен суат болмағандықтан шілде айында Жемнің кез келген тұсынан жылқы құлады. Себебі өзінің ізі әуелден суатқа келетін. Ал ол жер жабық тұр. Қай жер ойпаң, сол жерге түседі де ұйыққа жығылады.

Аудандық ауыл шаруашылығы бөлімі мәселеден хабардар. Бұған дейін өзен бойындағы 2 суат ашылыпты. Алдағы екі аптада барлығын қолданысқа береміз,- деп сендірді.

Жәнібек Сабыров, аудандық Ауыл шаруашылығы және жер қатынастары бөлімінің басшысы:

- Тұрғындардың тағы да қосымша өтініштеріне сәйкес, қысқы уақытта мұз ою үшін немесе осындай ұймаларға жағадағы мал жығылған жағдайда алып кету мақсатында көлікпен кіруге тағы да кеңейтіп, ашу беру жөнінде өтініштері қаралып, қазіргі таңда осы жұмыстарды атқарып жатқан «Сапинвест» ЖШС-ге ескерту айтылды.

Мал бағып, күнін көріп отырған шаруалар қыс түспей, суаттар ашылса дейді. Әйтпесе ішерге су таппаған төрт түліктің тағы да жардан жығылуы мүмкін. Жауаптылар болса, ұзаққа созбай суарттарды қалпына келтіреміз деп отыр.

Авторлары: Асланбек Шығыр, Айбек Байзақов, Амантай Мәтенов