Бектенов Таза үй Таза Ел экожобасына ұлттық мәртебе беруге қатысты жауап берді

Үкімет басшысы Олжас Бектенов Құрылтай депутаттарының Астанада жүзеге асырылып жатқан "Таза үй – Таза Ел" экологиялық жобасына ұлттық мәртебе беру туралы ұсынысына жауап берді. 

Олжас Бектеновтің айтуынша, бұл жобаның мақсаттары мен міндеттері жалпыұлттық "Таза Қазақстан" бастамасының негізгі бағыттарына сәйкес келеді. 

"Сонымен қатар, қоршаған ортаны қорғау және табиғи ресурстарға ұқыпты қарау мәселелері Қазақстан Республикасы Конституциясының ережелерінде де көрініс тапқан. Осыған байланысты жобаның іс-шараларын оған ұлттық жоба мәртебесін бермей-ақ, қолданыстағы жалпыұлттық "Таза Қазақстан" бастамасы аясында жүзеге асырып, ауқымын кеңейтуге болады", – деп жауап берді үкімет басшысы. 

Олжас Бектенов, сондай-ақ, "Таза Қазақстан" бастамасын жүзеге асыру аясында өңірлерде екінші мәрте кәдеге жаратуға болатын материалдарды қабылдау пункттерінің жұмысына KPI бекіту бойынша жұмыстары жүріп жатқанын еске салды. Осы бағытта KPI енгізілгеннен кейін ол "Таза Қазақстанның" өзге бағыттарына да қолданыла бастайды.