IT, энергетика, құрылыс. Қазақстанда ең көп жалақы төленетін он сала қандай

Қазақстанда жыл сайын мыңдаған түлек мамандық таңдайды. Алайда олардың бәрі еңбек нарығындағы нақты сұранысты ескере бермейді. Бір маман айына 1,5 млн теңге табады, ал енді бірі қанша жұмыс істесе де 150 мың теңге жалақы алады. Сондықтан жоғары жалақыға тәжірибе ғана емес, таңдаған мамандық та ықпал етеді. 

Төртінші тоқсан басталып, мектеп бітірушілер үшін қандай мамандық таңдайтынын нақты шешетін кез келді. Олардың алдында қай саланы таңдау керек деген сұрақ туындайды. Осы орайда Информбюро порталы еңбек нарығына шолу жасап, ең жоғары жалақы төленетін он саланы тізіп шықты.

IT саласы

Ақпараттық технологиялар саласы қарыштап дамыған сайын жаңа маманықтар пайда болып жатыр. Бұл салада тәжірибесі бар мамандарға сұраныс көп әрі оларға төленетін жалақы да жоғары. 

Еnbek.kz биржасында жұмыс берушілер бағдарламалық қамсыздандыру архитекторына – 2,3 млн теңге, ал бағдарламалық қамсыздандыру инженеріне 1 млн теңге жалақы ұсынады. Ал hh.kz сайтында жұмыс беруші 1С әзірлеушісі және талдаушысына 3 млн теңге жалақы беруге дайын болса, product manager жалақысы 1,7 млн теңгеге жетеді. Android-әзірлеушіге 1,6 млн теңгеге дейін еңбекақы төленеді. Backend әзірлеушілерге – 1,5 млн теңгеге дейін, Java Developer-ге 1,2 млн теңгеге дейін жалақы ұсынылады.

Авиация

Авиация саласында мамандарға жоғары талап қойылады, себебі бір ұшқыштың өзіне қаншама адамның өмірі сеніп тапсырылады. Сондықтан еңбек биржасында әуе командирінің жалақысы 2,8 млн теңгеге жетеді. Ал екінші пилоттың жалақысы – 1,9 млн теңге. Ал авиация диспетчеріне 900 мың теңгеге дейін еңбекақы төленеді. 

Әуе тасымалы саласында жұмыс істейтін ұшқыштар мен бортсеріктер, инженер-механиктер тәжірибе жинаған соң Қазақстанда ғана емес, жоғары жалақы төлейтін шетелдік компанияларда жұмыс істей алады.

Тау-кен өндірісі

Қазақстанда ең жоғары жалақы алатын жалдамалы қызметкер тізімін топ-менеджер емес, тау-кен өнеркәсібі саласындағы инженер иеленді. Ranking.kz мәліметінше жұмыс беруші оған айына 12 млн теңгеден астам еңбекақы төлейді. 

Мұнай-газ өндіру жөніндегі инженерге – 2 млн теңгеден бастап, өндірістік операциялар жөніндегі инженерге 1,7 млн теңгеден бастап жалақы төленеді. Ал кен қазу өнеркәсібіндегі учаске мастеріне 1,7 млн теңгеге дейін жалақы төленсе, бас инженердің жалақысы 1,5 млн теңгеге жетеді. Геологқа 1,6 млн теңге еңбекақы ұсынылады.

Көлік және логистика

Соңғы жылдары логистика қарқынды дамып келеді. Әсіресе халықаралық тасымал саласында жұмыс істейтін мамандар жоғары табыс табады.

Бұл салада басшылардың жалақысы 1 млн теңгеден асады. Десе де басшылық қызметтен өзге мамандарға да жақсы жалақы беріледі. Мысалы, еңбек биржасында темір жол саласында бас инженерге 1 млн теңге жалақы төленеді. Логистика маманының жалақысы 1 млн теңгеге жетеді. Ал Алматы метросында жұмыс істейтін техникалық қадағалау жөніндегі инженерге 750 мың теңге жалақы беріледі.  Астанада автобус жүргізушісіне 985 мың теңге жалақы ұсынады. 

hh.kz сайтында жұмыс беруші логистика менеджеріне 650 мың теңге еңбекақы төлейді.

Энергетика

Еңбек биржасында энергетика саласындағы бас механикке 1,6 млн теңге еңбекақы ұсынылады. hh.kz сайтында жұмыс беруші ТЭЦ директорына 1,5 млн теңге жалақы ұсынады. Еңбек биржасында инженер-электрик маманына 1 млн теңгеге дейін жалақы төленеді. Инженер-сметашыға 800 мың теңгеге дейін, ал инженер-жылу технигіне 650 мың теңге жалақы ұсынады. Бас энергетикке 750 мың теңге еңбекақы төленеді.

Құрылыс

Қазақстанда құрылыс саласында басшылық қызметтер мен сату менеджерлеріне жоғары жалақы төленеді. Одан бөлек техникалық мамандықтарға да жақсы еңбекақы қарастырылған. Құрылысты қадағалау жөніндегі инженерге 1,8 млн теңгеге дейін жалақы төленеді. Ал бас инженерге және инженер-құрылысшыға 1,2 млн теңге жалақы беріледі. Ал сапа жөніндегі инженердің жалақысы 1 млн теңгеден басталады.

Стоматология

Медицинада әсіресе стоматология саласында жалақы жоғары, себебі тіс емдеу қызметі арзан емес. Еңбек биржасында жұмыс беруші тіс дәрігеріне 700 мың теңгеге дейін төлеуге дайын. Ал hh.kz сайтында жұмыс беруші стоматолог-хирург дәрігерге 7 млн теңге дейін, стоматолог-терапевтке 5 млн теңгеге дейін төлеуге дайын. Балалар тіс дәрігеріне 3 млн теңгеге дейін, ал имплантолог дәрігерге 2 млн теңгеге дейін жалақы ұсынады.

Есеп және аудит

Еңбек биржасында бас бухгалтерге 1 млн теңгеге дейін жалақы төленсе, ал аға аудиторға 800 мың теңгеден басталатын жалақы ұсынады. Ал hh.kz сайтында жұмыс берушілер ұсынған бас бухгалтердің жалақысы 1,5 млн теңгеге жетеді, ал аудиторға 1 млн теңгеге дейін жалақы төлеуге дайын.

Ranking.kz мәліметінше, былтыр бір компания өзінің аудиторы үшін айына 7,3 млн теңге төлеген. 

Заң саласы

Заң саласында бірден көп табыс табу мүмкін емес. Десе де тұрақты әрі жоғары табыс әкелетін мамандық болып отыр. 

Еңбек биржасында заңгерге ай сайын 600 мың теңгеден бастап төлеуге дайын. Ал hh.kz сайтында заңгер маманына жұмыс беруші 1,3 млн теңгеге дейін еңбекақы төлеуге дайын. 

Сату саласы

Сату және digital маркетинг саласында табыс көбіне нәтиже мен бонусқа байланысты. Табысты мамандар айына 500 мыңнан 1 млн теңге аралығында табыс таба алады. Әсіресе, сату менеджерлерінің табысы жоғары. Мысалы, hh.kz сайтында сату менеджеріне 1,5 млн теңгеге дейін жалақы ұсынылады.