2026 жылы Қазақстанда ең жиі төленетін айыппұл түрлері қаншаға өседі?

Қазақстан Үкіметінің шешімімен 2026 жылдың 1 қаңтарынан бастап айлық есептік көрсеткіш (АЕК) тағы да өседі. Бұл айыппұлдардың, мемлекеттік баждардың және әлеуметтік төлемдердің сомасы автоматты түрде өзгеретінін білдіреді. Informburo.kz порталы күнделікті өмірде қазақстандықтар жиі тап болатын 12 әкімшілік құқық бұзушылыққа келесі жылы қанша айыппұл салынатынын есептеді.

№. Көлікке маусымға сай дөңгелек тақпау

Қазақстан Республикасының Әкімшілік құқық бұзушылық туралы кодексіне сәйкес, көлік шиналарын маусымға сай ауыстырмаған жүргізушілерге 21 625 теңге (5 МРП) мөлшерінде айыппұл салынады. Егер сіз бұл заң бұзушылықты бір жыл ішінде қайталасаңыз, айыппұл сомасы күрт өсіп, 86 500 теңгені (20 МРП) құрайды.

№2. Тыныштықты бұзу

Заң бойынша сағат 22.00-ден 9.00-ге дейін шулауға болмайды. Тұрғын үй ғимараттары мен тұрғын үй құрылысы аумақтарында орналасқан ойын-сауық орындарына жұмыс күндері сағат 22.00-ден таңғы 9.00-ге дейін, демалыс және мереке күндері сағат 23.00-ден таңғы 10.00-ге дейін тыныштықты бұзуға тыйым салынады.

Түнде көршілеріңіздің тыныштығын бұзғаныңыз үшін:

Жеке тұлғаларға – 21 625 теңге (5 АЕК). Бір жыл ішінде қайталанса – 43 250 теңге (10 АЕК). Кәсіпкерлерге салынатын айыппұл сомасы – 86 500 теңгеден (20 АЕК) бастап, 648 750 теңгеге (150 АЕК) дейін жетеді.

№3. Қоғамдық орындарда ішімдік ішу

Көшеде, подъезде ішімдік iшкен немесе масаң күйде келген адамға 21 625 теңге (5 АЕК) мөлшерінде айыппұл салынады. 18 жасқа толмаған жасөспірім болса, оның ата-анасы дәл осындай мөлшерде айыппұл төлейді.

Егер бұзақылық бір жыл ішінде қайталанса – 43 250 теңге (10 АЕК) мөлшерiнде айыппұл немесе бес тәулікке дейін қамаққа алу қарастырылған. 

№4. Тіркеусіз және жеке куәліксіз жүру

Бір айдан артық мерзімде жеке куәлiксiз жүрген, тұрғылықты немесе уақытша тұратын жеріне тiркелмегендерге 30 275 теңге (7 АЕК) мөлшерінде айыппұл қарастырылған. 

Ал пәтеріне тұрмайтын адамдарды тiркеген жеке тұлғаларға 43 250 теңге (10 АЕК) айыппұл бар. 

Бір жыл ішінде құқық бұзушылық қайталанса – 56 225 теңге (13 АЕК) төлеуге тура келеді.

№5. Кәмелетке толмағандардың түнде жүруі

Кәмелетке толмаған балалары 22.00-ден кейін ойын-сауық мекемелерінде болса, ата-анасына 12 975 теңге (3 АЕК) мөлшерінде айыппұл салынады. Ойын-сауық мекемесінің иелері де түнде 18 жасқа толмаған балаларды кіргізгені үшін 43 250 теңгеден (10 АЕК) 432 500 теңгеге (100 АЕК) дейін айыппұл төлейді. 

Ал бала 23.00-ден 6.00-ге дейін үйден тыс жерде жүрсе ата-анасына ескерту жасалады, ал бұл әрекет бір жыл ішінде қайталанса – 30 275 теңге (7 АЕК) айыппұл қарастырылған. 

№6. Қоғамдық орында түкіру

Қоғамдық орында түкіргені үшін, сондай-ақ белгіленбеген жерлерде қоқыс тастағаны үшін азаматтарға 21 625 теңге (5 АЕК) айыппұл көзделген. Егер бұл әрекет қайталанса, 43 250 теңге (10 АЕК) айыппұл төлеуге тура келеді. 

№7. Жолды кесіп өту

Жолдан өтуге рұқсат етілмеген: бағдаршам немесе жаяу жүргінші жолағы жоқ жерден өткен адамға 8 650 теңге (2 АЕК) мөлшерінде айыппұл салынады. Егер бұл әрекет қайталанса немесе бұл әрекет салдарынан біреу зардап шексе, 43 250 теңге (10 АЕК) төлеу керек болады. 

№8. Автобуста жолақы төлемеу

Қоғамдық көлікте жолақы төлемей жүрген жолаушыға 8 650 теңге (2 АЕК) айыппұл көзделген. Ал жолаушыларды билетсіз алып жүргені үшін 21 625 теңге (5 АЕК) айыппұл бар.

№9. Балағаттау 

Қоғамдық орындарда былапыт сөйлеп, жеке тұлғаларға зәбірлеп тиiсіп және айналасындағыларға құрметпен қарамай, қоғамдық тәртiп пен жеке тұлғалардың тыныштығын бұзатын іс-әрекет жасаған адамға 86 500 теңге (20 АЕК) айыппұл салынады немесе 5-тен 15 тәулiкке дейiнгi мерзiмге әкiмшiлiк қамаққа алынады. Құқық бұзушылық бiр жыл iшiнде қайталанса 15 тәуліктен 30 тәулікке дейінгі мерзiмге әкiмшiлiк қамаққа алынады.

№10. Абаттандыру қағидаларын бұзу

Қалалар мен елдi мекендердiң аумақтарын абаттандыру қағидаларын бұзған, сондай-ақ инфрақұрылым нысандарына зарар келтірген, жасыл желекті жойған және бүлдірген жеке тұлғаларға ескерту жасалады немесе 86 500 теңге (20 АЕК) мөлшерінде айыппұл салынады. Егер бір жыл iшiнде заң бұзушылық қайталанса айыппұл сомасы – 129 750 теңге (30 АЕК) болады.

№11. Қоғамдық орындарды ластау

Қоқысты терезеден лақтыру, соның ішінде темекі тұқылын лақтыру, баспалдаққа немесе аулаға, балалар алаңына қоқыс пакеттерін тастап кету, саябақтарды, скверлердi ластау, оның iшiнде белгiленбеген орындарға коммуналдық қалдықтарды тастау секілді заң бұзушылық жасаған адамдарға 21 625 теңге (5 АЕК) айыппұл салынады. Бір жыл ішінде қайталанса – 143 250 теңге (10 АЕК) төлейді.

Баспалдақ аумағына ескі жиһаз, қораптар мен басқа да әртүрлі заттарды қою өрт қауіпсіздігі ережелерін бұзу болып естептеледі. Мұндай жағдайда жеке тұлғаларға алдымен ескерту жасалады, содан кейін 21 625 теңге (5 АЕК) көлемінде айыппұл салынады. Бір жыл ішінде қайталанса 43 250 теңге (10 АЕК) айыппұл көзделген.

№12. Тыйым салынған орындарда темекі шегу

Тыйым салынған орындарда темекі шеккені үшін азаматтарға 64 875 теңге (15 АЕК) айыппұл салынады. Құқық бұзушылық бір жыл ішінде қайталанса айыппұлдың көлемі 86 500 теңгеге (20 АЕК) дейін өседі.

Ал ұшақта темекі шеккені үшін 216 250 теңге (50 АЕК) төлеуге тура келеді.

Автобус аялдамалары, балалар алаңдарында да темекі шегуге тыйым салынған.

Көлік салонында кәмелет жасқа толмаған балалар отырғында темекі шеккені үшін 43 250 теңге (10 АЕК) көлемінде айыппұл салынады. Осы заңсыз әрекет бір жылдың ішінде қайталанса, айыппұлдың мөлшері екі есеге (86 500 теңге) артады.

Темекі бұйымдарына қыздырылатын темекісі бар бұйымдар, қорқорға арналған темекі, қорқор қоспасы, темекі қыздыруға арналған жүйелер, тұтынудың электрондық жүйелерін және оларға арналған сұйықтықтар жатады.