"Түстеріңде ғана көресіңдер". Қырғыз президенті мемлекеттік төңкеріс жасағысы келетіндерге азу тісін көрсетті

Қырғызстан президенті Садыр Жапаров елде жағдайды тұрақсыздандыруға және билікті ауыстыруға ешқандай негіз жоқ екенін айтып, халыққа үндеуін жариялады. 

Оның айтуынша, ел ішінде әлеуметтік мәселелерді ушықтыру арқылы мемлекеттік төңкеріс жасауға әрекет етіп жатқан жекелеген топтар бар. Олардың арасында бұрын коррупциямен қолға түскен және көлеңкелі кәсібінен айырылып қалған адамдар бар. 

"Қысқасы, жеке мүддесі үшін ренжігендер, ызасын іште жинап жүргендер десек болады. Оларға айтарым енді көтерілісті тек түстеріңде көресіңдер. Көтерілісті пайдаланып қарақшылық, тонаушылық әрекеттер жасап бір лауазымды иелену арқылы байып кету деген болмайды, оны да түстеріңде ғана көресіңдер", – деді Садыр Жапаров. 

Оның сөзінше, Қырғызстанда қазір көтеріліске негіз жоқ. 

"Көтеріліске негіз болатын себеп жоқ. Қырғызстан қазір әлсіз емес мықты мемлекет. Оған қоса, халықтың өзі кімдерді қуып тастау, ал кімдер билікте отыруы керек екенін жақсы түсініп отыр", – деп түйіндеді Садыр Жапаров.