14 жасар мүгедектігі бар қыз зорлықтан кейін жүкті болып қалған

Жамбыл облысының Қордай ауылында ақыл-есі кемістігі бар 14 жасар жасөспірімнің зорлануы қоғамды дүр сілкіндірді. Жәбірленушінің анасы тергеудің баяу жүріп жатқанына наразылық білдіріп, әділдік талап етуде, деп хабарлайды Arasha.kz.

Анасының айтуынша, сұмдық жағдай 2025 жылдың жазында басталған. Бірінші жағдайда ауыл тұрғыны қызды үйінен алдап алып кетіп, қонақүйде ұстаған. Кейінірек бұл қылмыс таныстарының қатысуымен бірнеше рет қайталанған. Анасы Гүлшаттың айтуынша, қызын үш мәрте ұрлап әкеткен көрінеді.

Бүгінде жасөспірім қыздың жүктілігіне 28 апта толған. Дәрігерлер қыздың өміріне қауіп төнуі мүмкін болғандықтан, түсік жасатуға рұқсат бермеген.

«Қызым жүкті екенін біледі, бірақ оны толық сезінбейді. Ол әлі күнге дейін қуыршақ ойнайды», — дейді анасы.

Анасы баласына қарау үшін жұмысынан шығуға мәжбүр болған, ал қыз бала үйден оқу форматына көшкен.

Қордай аудандық полиция бөлімі 16 жасқа толмаған адамға қатысты сексуалдық сипаттағы іс-әрекеттер бабы бойынша қылмыстық іс қозғады. Қазіргі уақытта бір күдікті анықталып, полицияға жеткізілген.

Алайда, жәбірленуші тарап тек бір ғана адамның ұсталғанына және басқа қатысушылардың бостандықта жүргеніне алаңдаулы. Анасы істің ашықтығын қамтамасыз ету үшін Бас прокуратураға шағым түсіруді жоспарлап отыр.