170 пәтерді заңсыз иемдену әрекеті: 19 күдіктіге айып тағылды

Жедел бейнежазбадан алынған стоп-кадр

Астанада құны 4,4 млрд теңгеден асатын әлеуметтік тұрғын үйді заңсыз иемдену әрекетіне қатысты резонанс тудырған тергеу аяқталды. Алаяқтық схеманы бұрын 1,5 мың үлескерді алдағаны үшін жаза өтеген, аты даулы «Төленді» ТКК төрағасының бұрынғы басшысы ұйымдастырған.

ҚР Бас прокуратурасының үйлестіруімен Қаржылық мониторинг агенттігі (ҚМА) ауқымды алаяқтық ісін сотқа жолдады. Бұл іске жалған тұлғалармен қатар құқық қорғау органдарының қызметкерлері де тартылған.

Алаяқтық схемасы: «өткен күнмен» рәсімделген келісімшарттар

2016 жылы «Төленді» тұрғын үй-құрылыс кооперативінің (ТКК) басшысы А. Байжұманов 1,5 мың үлескерден 10 млрд теңге жымқырғаны үшін сегіз жылға бас бостандығынан айырылған болатын. Кейін құрылысы тоқтап қалған үйлерді Астана әкімдігінің қатысуымен мемлекет аяқтап шықты. Бұл пәтерлердің бір бөлігі жетім балаларға, көпбалалы отбасыларға және мүгедектігі бар адамдарға беруге арналған.

Бостандыққа шыққаннан кейін Байжұманов сыбайластарымен бірге дәл осы әлеуметтік тұрғын үйді заңсыз иемденуді ұйғарған.

«Жалған үлескерлерді» іздеу. Қылмысқа қатысушылар 80-нен астам адамды тауып, олардың атына үлестік жарналар туралы жалған келісімшарттарды өткен күнмен рәсімдеген.

Қылмыстық істерді қолдан жасау. Жалған тұлғалардың атынан полицияға «алаяқтық» туралы жалған арыздар берілген. Сол арыздардың негізінде қылмыстық істер қозғалып, «жалған үлескерлер» жәбірленуші деп танылған.

Заңдастыру және қайта сату. Сот шешімдері арқылы алаяқтар 170 пәтерді өз аттарына заңды түрде рәсімдеп, кейін оларды ештеңеден хабарсыз адамдарға сатуды жоспарлаған.

Схеманы жүзеге асыру барысында алаяқтар жалған келісімшарттардың бір бөлігін үшінші тұлғаларға сатып үлгеріп, оларға қосымша 400 млн теңге көлемінде залал келтірген.

Алдын алынған залал. ҚМА-ның араласуының арқасында жалпы құны 4,4 млрд теңгеден асатын 170 жылжымайтын мүлік нысанын заңсыз иемденуге жол берілмеді.

Полиция қызметкерлерінің қатысы және қамауға алу

Тергеу барысында шулы істің тағы бір мән-жайы анықталды: қылмыстық схемаға қажетті «қылмыстық істердің» қозғалуына және ілгерілеуіне көмектескен полиция қызметкерлері де тартылған. Оларға қатысты өкілеттіктерін теріс пайдалану және дәлелдемелерді қолдан жасау фактілері бойынша жеке тергеулер басталды.

Іс бойынша 19 адам күдікті деп танылды.

9 фигурант қамауға алынды.

Күдіктілердің құны 250 млн теңгеден асатын мүлкіне тыйым салынды.

Қазіргі уақытта сотқа дейінгі тергеп-тексеру аяқталды. Іс фигуранттары мен олардың адвокаттары қылмыстық іс материалдарымен танысып жатыр.

Кеше, 10:58