АҚШ та Фидель Кастроның бауырын қамауға алуға ордер берілді

Флориданың Он бірінші сот округінің төрағасы Ариана Фахардо Оршан 1996 жылы екі гуманитарлық ұшақтың көзін жоюға қатысы бар деген күдікпен Кубаның бұрынғы көшбасшысы Рауль Кастроны тұтқындауға ордер берді, деп хабарлайды Tengrinews.kz NBC6-ға сілтеме жасап.

Кейін өткен баспасөз мәслихатында Флориданың бас прокуроры Джеймс Утмайер Кастроға бірінші дәрежелі кісі өлтіру мақсатында сөз байласты деген айып тағылғанын мәлімдеді.

Бұған дейін, 20 мамырда АҚШ-та Кастроға 1996 жылы екі ұшақты атып түсірудегі рөліне байланысты федералдық айып тағылған болатын. Бұл ұшақтар Майамиде орналасқан Brothers to the Rescue ("Құтқарушы ағайынды") эмигранттар ұйымына тиесілі еді.

Кастро мен тағы бес адамға - Лоренсо Альберто Перес-Переске, Эмилио Хосе Паласио Бланкоға, Хосе Фидель Гуаль Барзагаға, Рауль Симанка Карденасқа және Луис Рауль Гонсалес-Пардо Родригеске кісі өлтірудің төрт эпизоды, әуе кемелерін жоюдың екі эпизоды, сондай-ақ АҚШ азаматтарын өлтіру мақсатында сөз байласу бойынша айыптар тағылды.

Қазір Кастро 95 жаста. 1996 жылы ол Кубаның қорғаныс министрі қызметін атқарған. Қалған бес айыпталушы - операцияға қатысты деп есептелетін ұшқыштар.

Еске сала кетейік, Дональд Трамп Ақ үйге оралғаннан кейін АҚШ пен Куба қарым-қатынасы күрт шиеленісіп кетті. 2026 жылдың басынан бастап Вашингтон Кубаға мұнай блокадасын енгізді, бұл аралда энергетикалық дағдарыс пен жаппай электр жарығының сөнуіне түрткі болды. Трамп Куба үкіметін бірнеше рет сынап, елді "достық ниетпен қосып алу" мүмкіндігін жоққа шығармады.

Рауль Кастро - Куба революциясының көсемі Фидель Кастроның інісі. 2021 жылдың сәуіріне дейін Рауль Кастро Куба Коммунистік партиясы Орталық комитетінің бірінші хатшысы лауазымын атқарды.

2006 жылы Фидель Кастро денсаулығына байланысты негізгі барлық лауазымы бойынша өкілеттігін інісіне тапсырды. 2008 жылы Рауль Кастро ресми түрде Куба президенті болды. 2018 жылы ол Мемлекеттік кеңес пен Министрлер кеңесінің төрағасы қызметтерінен кетіп, оның орнына елдің қазіргі президенті Мигель Диас-Канель келді.

Бізді Google-дың негізгі дереккөздер тізіміне қосыңыз