2029 жылға қарай инвестициялардың ЖІӨ ге үлесі 23% ға өседі

Үкімет отырысында Премьер-министрдің орынбасары – Қазақстан Республикасы Ұлттық экономика министрлігі басшысы Серік Жұманғарин 2025-2029 жылдар аралығында елге тартылатын жиынтық инвестиция көлемі 400 млрд АҚШ долларына жететінін мәлімдеді.

Оның айтуынша, ұлттық жоспарға сәйкес инвестициялардың жалпы ішкі өнімге қатынасы қазіргі 14-15 пайыздан 2029 жылы 23 пайызға дейін өседі. Бұл негізгі капиталға салынатын инвестицияларды 2024 жылмен салыстырғанда 2,5 есеге арттыруға мүмкіндік береді.

Сондай-ақ Қазақстан 2020-2024 жылдары экономикалық күрделілік индексі бойынша 87-орыннан 55-орынға көтеріліп, әлемнің 145 елі арасында өз позициясын жақсартқан.

Министрдің мәліметінше, көрсеткіштің кезең-кезеңімен өсуі қосымша 120 млрд доллар инвестиция тартуға жол ашады.