2036 жылғы Олимпиада Мюнхенде өтуі мүмкін

Берлин уақытымен сағат 20:21-де 364 сайлау учаскесінің 345-інде дауыстар саналған. Нәтижесінде «иә» деп жауап бергендердің саны «қарсы» болғандардан екі есе көп — 284 мың адам қарсы 144 мың адам.

Süddeutsche Zeitung газетінің хабарлауынша, дауыс беру белсенділігі (38,5%) Мюнхен тарихындағы рекордтық деңгейге жетті. Бұған дейінгі рекорд 2001 жылы тіркелген болатын, сол кезде қала тұрғындары Фреттманинг ауданында жаңа стадион салу мәселесіне қатысты референдумға қатысып, 37,5% көрсеткішке жеткен еді.

Неміс Олимпиадалық спорт конфедерациясы (DOSB) 2026 жылы ғана Германияның Олимпиада өткізуге ресми өтінім беретін-бермейтіні туралы шешім қабылдайды, деп хабарлайды dpa агенттігі. Сонымен қатар, Олимпиаданы өткізу орны ретінде Берлин, Гамбург немесе Рейн-Рур аймағы да қарастырылуы мүмкін.

Гамбург билігі өз қаласындағы Олимпиада өткізу мәселесіне қатысты референдумды 2026 жылғы 31 мамырға белгілеген.

Айта кетейік, жазғы Олимпиада Мюнхенде бір рет — 1972 жылы өткен. Алайда ол ойындар палестиналық лаңкестік ұйымның терактісімен есте қалған: сол оқиғада 11 израильдік спортшы мен бір батысгерманиялық полицей қаза тапқан еді.

Айта кетейік, Қатар 2036 жылғы Олимпиаданы өткізуге өтінім берді.