24KZ тілшісі аязда суға түсті

«Арқада қыс болмайды. Қар жоқ. Аяз жоқ» деген едік. Бірақ кейінгі күндері орай да борай қар жауып, аяз қысып барады.

Сумаңдаған жел де ызғырып тұр. Өңменіңнен өтеді. Бірақ аяз қанша аттандаса да адамды жеңген жоқ. Астанада жұрт тіпті жазыдкүнгідей суға шомылып жатыр. Қарға қыздырынған сол көптің ішінде, тіпті біздің тілшіміз де бар. 

Таңғы сағат 06:00. Сынап бағанасы 21 градус суықты көрсетіп тұр. Бірақ өткір желдің әсерінен ауа температурасы -30 градустай сезіледі. Алайда «морждар» үшін үскірік аяз кедергі емес. 

Денесін қыздырған қыз-жігіттер Сарыарқаның қызылшұнақ аязын елер емес. Құдды бір аптап ыстықта жүр ме дерсің. Олар күнделікті әдеті бойынша жаттығып барып, мұзды суға шомылады.

Айдос Талғатұлы, қала тұрғыны:

- Бүгін 2-рет түсіп жатырмын. Өткен демалыста келгенмін. Басында қорқынышты болды. Өзім интернеттен адамдардың суға түсіп жүргенін көрдім. Басында суық болды, шынымды айтайын. Енді ақырындап денені үйретіп жатырмын. Судың пайдасы көп. Тестостерон деңгейін көтереді. Иммунитет мықты болады.

Қанат Қалмағамбетов, қала тұрғыны:

– 2019 жылдан бастадым. 6 жыл, 7-ші маусым. Мысалы, қазір бірінші рет түсейін деп отырмын. Ең бастысы қорықпау керек. Ниет керек. Денсаулық үшін. Қазір дәрі ішпейміз. Тұмауды сезсек жүгіріп, суға түсуге келеміз.  

Қазір арнайы клубқа 300-ден астам қала тұрғыны мүше. Олар күн сайын өзенге келіп, Есілге түсуді әдетке айналдырған. Себебі мұзды су қан айналымын жақсартып, бойды сергітеді. Яғни таңғы ызғар олар үшін жаңа күннің қуат көзі.  

Мұнда келгендер қыстың қақаған аязына қарамастан мұздай суға түсуден қорықпайды. Мен де олардан қалыспай бағымды сынап көрейін деп шештім. Әсерді сөзбен жеткізу мүмкін емес. Адреналин ойнап тұр. Өз бойымдағы фобиямды жеңдім.   

Қуаныш Айтжанов, қала тұрғыны:

- Барлық жастарды осылай суға түсуге шақырамын. Әрине, оңай емес. Бірақ өз-өзіңмен күресу аясында денсаулыққа өте пайдалы нәрсе.

Енді басындағы қобалжу бар, қиындық бар барлығы артта қалды. Қазір өзімді жеп-жеңіл сезініп тұрмын.  

Суға түскісі келетіндер алдымен психологиялық тұрғыда дайын болу керек. Егер денсаулығында қандай да бір кінәрат, өзіне күмән болса түспеген абзал дейді мамандар. Яғни сенімді болмасаңыз, біздің ісімізді сіздерге қайталауға болмайды.

Авторлары: Мерей Қанапия, Досбол Байділдин