25,2 миллион теңге айыппұл және тәркілеу Қазақстанның екі әуежайы заң бұзушылықтары үшін жазаланды

Қазақстанның екі бірдей әуежайы заң бұзушылықтар үшін жауапкершілікке тартылды. Тараздың "Әулие-Ата" халықаралық әуежайы авиакеросинді монополиялық жоғары бағамен сатқаны үшін айыппұл арқалап, одан түскен 25,2 миллион теңге табысы тәркіленді. Ал Шымкент әуежайында жүргізілген тексеріс өнеркәсіптік қауіпсіздік талаптарының бұзылғанын анықтады, деп хабарлайды Tengri Travel.

Тараз әуежайына авиакеросин бағасына байланысты айыппұл салынды

Тараздың "Әулие-Ата" халықаралық әуежайы авиакеросинді монополиялық жоғары бағамен сатқаны үшін 3,2 миллион теңге көлемінде айыппұл арқалады.

Бұған қоса, кәсіпорынның монополияға қарсы заңнаманы бұзу нәтижесінде тапқан 25,2 миллион теңге табысы тәркіленді.

Заң бұзушылықты Бәсекелестікті қорғау және дамыту агенттігінің Жамбыл облысы бойынша департаменті анықтаған. Мамандар авиакеросин бағасының қалыптасуы мен динамикасын зерттеп, содан кейін тергеу жүргізген.

Бастапқыда әуежай тергеу нәтижелерімен келіспей, оған бірінші және екінші инстанциядағы соттарға шағым түсірді. Алайда Жамбыл облыстық сотының әкімшілік істер жөніндегі сот алқасы тергеу нәтижелерін заңды әрі негізді деп таныды.

Кейінірек Тараз қаласының әкімшілік құқық бұзушылықтар жөніндегі мамандандырылған сотында әуежай өз кінәсін мойындады.

Сонымен қатар монополияға қарсы департамент әуежайға заң бұзушылықты тоқтату және авиакеросинге экономикалық тұрғыдан негізделген баға белгілеу туралы нұсқама берді.

Шымкент әуежайына өнеркәсіптік қауіпсіздік ережелерін бұзғаны үшін айыппұл салынды. ТЖМ Өнеркәсіптік қауіпсіздік комитетінің мамандары жанармай қоймаларының, қазандық қондырғыларының және басқа да инженерлік инфрақұрылымдардың жай-күйін тексерді.

Тексеріс қорытындысы бойынша әуе айлағында өнеркәсіптік қауіпсіздік талаптарының бұзылғаны белгілі болды. Заңды тұлға әкімшілік жауапкершілікке тартылып, анықталған барлық кемшілікті жоюға міндеттелді. Ведомство заң бұзушылықтардың сипаты мен айыппұл көлемін нақтыламады.

Бұған дейін Алматы қаласының әкімшілік құқық бұзушылықтар жөніндегі мамандандырылған ауданаралық соты Алматы әуежайын өрт қауіпсіздігі нормаларын сақтамағаны үшін жауапқа тартқан болатын. Айыппұл сомасы 2 162 500 теңгені құрады. Бұл ретте әуежай жұмысы тоқтатылған жоқ.

Тағы оқыңыз: Алматы әуежайы су тасқынынан кейін жазаланды

Бізді Google-дың негізгі дереккөздер тізіміне қосыңыз